बागलुङ — दुई महिनाकी सुत्केरी पैदलै पोखरादेखि बागलुङ आइपुगेकी छिन् । रोल्पाको सुनछहारी गाउँपालिका ५ घर भएकी २० वर्षीया रविना थकाली आइतबार बिहानै हिँडेर बागलुङ आएकी हुन्।

पोखराको बाटुलेचौरमा मदजुरी गर्दै आएकी उनी काम नपाएपछि घर फर्केकी हुन् । पैदलै ५ देखि ७ दिनमा पुग्ने आशले निस्केको उनले बताइन् । श्रीमान बालकुमार पनि सँगै छन् । बालकुमारकै दाइभाउजु र दुई छोरा पनि सँगै पैदलयात्रामा निस्केका हुन् । 

पोखरामा काम गराउने ठेकेदार र साहुहरुले रासनपानी दिन छाडेपछि भोकमरी लागेको भन्दै उनीहरु घर निस्केको बताए । उनीहरुका साथमा पैसा पनि छैन । ‘सबैको साथमा पाँच–सात सय रुपैयाँ मात्र थियो, त्यसैले चिउरा किनेर खाँदै हिँडेका हौं’ उनले भनिन्, ‘घरमा पुगियो भने बारीमा तरकार फलाएर पनि बाँचिएला भनेर हिड्ने आँट गरें ।’ दिनभरी पैदल हिँडेकोले उनी थला परेको बताइन् ।