गोरखा — कोरोना भाइरस(कोभिड–१९) लाई लक्षित गरेर दिइने खाद्यान्न सहयोग नलिने शहिद लखन गाउँपालिकाले निर्णय गरेको छ । विपन्न तथा असहाय घर परिवारलाई दिइने खाद्यान्न सहयोग तत्कालका लागि नलिने कार्यपालिका बैठकबाट निर्णय गरेको गाउँपालिका अध्यक्ष रमेश थापाले बताए ।

‘खाद्यान्न सहयोग गर्न चासो देखाउने धेरै हुनुहुन्छ, सबैसँग लिँदा गुणस्तरीयतामा पनि प्रश्न उठ्ने भयो,’ उनले भने । कार्यपालिका बैठकले कोरोना भाइरस रोकथाम तथा नियन्त्रण सन्दर्भमा प्राप्त हुने आर्थिक र स्वास्थ्य सुरक्षा सामाग्री भने स्वीकार गर्ने निर्णय गरेको छ । विपत् व्यवस्थापन कोषमा जम्मा भएको रकमले खाद्यान्न खरिद गरेर वितरण गर्दा एकरुपता आउने तथा गुणस्तरीय हुने उनले बताए । 

पालिका भरिका प्रहरी इकाइलाई ५० लिटरका दरले इन्धन उपलब्ध गराइएको पनि गाउँपालिकाले बताएको छ । ‘कोभिड–१९ को रेडजोनमा परेकालाई स्वास्थ्य संस्थाको सिफारिसमा निशुल्क एम्बुलेन्सको व्यवस्था मिलाएका छौँ,’ थापाले भने । 

लकडाउनले ज्याला मजदुरी गर्न बन्चित भइ सामान्य खानपानको व्यवस्था गर्न नसकेका झन्डै ४ सय परिवारलाई प्रदेश सरकारको कार्याविधि अनुसार राहत उपलब्ध गराउन प्रक्रिया सुरु गरिएको गाउँपालिकाका प्रमुख प्रशासकीय अधिकृत जीवन आलेले बताए । ‘खाद्य संकटमा परेका असहाय घर परिवारलाई पनि राहत उपलब्ध गराउँछौं,’ उनले भने ।