वीरगन्ज — जेठको चर्को घाम र गर्मीमा विद्यालयको खुल्ला चौरमा बाँसमा टाँगिएको त्रिपालमुनि १४ जना युवा बसिरहेका छन् । पर्साको पर्सागढी गाउँपालिका– ८ हरपुरको नेपाल राष्ट्रिय प्राथमिक विद्यालयमा निर्माण गरिएको क्वारेन्टाइनमा विगत तीन दिनदेखि ती १४ जना खुल्ला आकाशमुनि छन् । 

२५ जना क्षमताको क्वारेन्टाइनमा ४ महिलासहित ४६ जना राखिएको छ । भारतको केरला राज्यमा रोजगारीका लागि गएका उनीहरु कोरोना महामारीमा गाउँ फर्किएका हुन् । पूर्वी नाका काँकरभिट्टाबाट ३४ हजार रुपैयाँ भाडामा माइक्रो रिजर्ब गरेर गाउँमा आएपछि नगरपालिकाले उनीहरुलाई उक्त क्वारेन्टाइन पठाएको थियो । 

त्रिपालमुनि बसिरहेका श्यामबाबु राउत कुर्मीका अनुसार उनीहरुले पहिलो रात खुल्ला चौरको भुइँमै बिताए । घरमा त्रिपाल हुनेहरुले दोस्रो दिन फोन गरेर त्रिपाल मगाएको उनले सुनाए । ‘पहिलो रात नगरपालिकाले दिएको एउटा तन्नामात्र ओछ्यार खुल्ला चौरमा सुत्यौं,’ कान्तिपुरसँग कुर्मीले भने, ‘भोलिपल्ट घरबाट त्रिपाल र बाँस मगाएर टाँग्यौँ । फाटेको त्रिपालले घाम पानी त्यत्ति छेक्दैन ।’ 

जेठको चर्को घाममा दिउँसो त्रिपालमुनि बस्न साह्रै गाह्रो भएको उनी बताउँछन् । क्वारेन्टाइनमा बसेको तेस्रो दिन शुक्रबारमात्र नगरपालिकाले खाट उपलब्ध गराएको छ । ‘दुई रात भुइँमा सुतेपछि शुक्रबारमात्र खाट आएको छ,’ उनले भने, ‘झुल जम्मा ७ वटा दिएका छन् । दुईवटा खाट जोडेर सुत्छौं ।’ उनका अनुसार तीन दिनमा १४ जनालाई प्रयोग गर्न ६ वटामात्र मास्क दिएका छन् । बाँकीले विगत १२ दिनदेखि एउटै मास्क लगाइरहेका छन् । क्वारेन्टाइनमा ६ वटा शौचालय छ । तर, भारतबाट आएका ४६ जनालाई प्रयोग गर्न दुईवटा शौचालय मात्र दिइएको छ । नगरपालिकाका स्वास्थ्यका ४ जना कर्मचारीले चारवटा शौचालय प्रयोग गरेर अन्य समय ताला लगाउँछन् ।

४६ जनाले दुईवटा शोचालयका लामो लाइन लाग्नुपर्छ । ‘कोरोना संक्रमण होला न होला,’ कुर्मी भन्छन्, ‘तर, शौचालयको दुर्गन्धले अरु रोग चाहिँ पक्कै हुन्छ ।’ सरससफाईका सामग्री उपलब्ध गराइएको छैन । क्वारेन्टाइनस्थलमा एउटामात्र चापाकलको व्यवस्था छ । सबैले त्यही प्रयोग गर्छन् । ‘अनेक दुख कष्ट गरेर गाउँ फर्क्यौं,’ क्वारेन्टाइनमा रहेका घनश्याम साह भन्छन्, ‘नेपालको बोर्डर प्रवेश गरेदेखि नै वडा अध्यक्षसँग कुरा भइराख्थ्यो, मेयर साहेबको पनि क्वारेन्टाइनमा सबै व्यवस्था गरेको अन्तरवार्ता सुनेका थियौं । यहाँ आएपछि मन दुखित बन्यो । खुल्ला चौरमा सुतेको ३ दिन भयो ।’

क्वारेन्टाइन रहेको वडाका अध्यक्ष किशुनदेवा यादवले मनवा स्कुलमा क्वारेन्टाइन निर्माण गरि १४ जनालाई सार्ने तैयारी भइरहेको बताउँछन् । पर्सागढी नगरपालिकाका मेयर लोकनारायण यादवले चौरमा बसिरहेका १४ जनाको व्यवस्थापनमा लागेको दाबी गर्छन् । ‘चौरमा बसिरहेकाहरुको व्यवस्थापन भइरहेको छ,’ कान्तिपुरसँग उनले फोनमा भने, ‘त्यसमै लागेका छौँ ।’ तीन दिनमा १४ जनालाई ६ वटा मात्र मास्क दिएको विषयमा मेयर यादवले भने, ‘सबै हेर्दै छौँ ।’