काठमाडौँ — भ्रष्टाचार र सामाजिक सञ्जालमा लगाइएको प्रतिबन्दको विरोधमा जेन–जी पुस्ताले सोमबार बिहानदेखि सडकमा प्रशर्दन गरिरहेका छन् । उनीहरूको प्रदर्शनलाई कलाकारहरूले पनि साथ दिएका छन् ।

अभिनेताद्वय मदनकृष्ण श्रेष्ठ र आचार्यले पनि बिहान फेसबुक स्टाटसमार्फत् उनीहरूले आन्दोलनलाई समर्थन जनाए ।

हरवंशले घरनिरको सडक पिच गरेको केही समयमै भत्किएको दृश्य देखाउँदै लेखेका छन्, ‘म हरेक दिन मनमा सोच्दै थिएँ यो बाटो यति चाँडो कसरी भत्कियो ? हरेक दिन त्यही बाटो हिँड्छु तर सोच्छु मात्र । तर अहिलेको पुस्ता यस्ता प्रश्न मनभित्र मात्र सोच्दैनन् । प्रश्न उठाउछँन्,  जनताको करले बनेको बाटो किन भत्कियो ? कसरी भत्कियो ? यसको जिम्मेवारी कसको ? यो एउटा सानो उदाहरण मात्र हो आजका पुस्ताले प्रश्न गरेका । आज उठेको आवाज कुनै व्यवस्था बिरुद्वको आवाज होइन तर यो व्यवस्था हाकिराख्नु भएका सबै दलका नेता र कर्मचारीको कार्य माथिको  प्रश्न हो... ।’

उनले नेताहरूलाई लक्षित गर्दै उनीहरूबाट नयाँ पुस्ताले गरिररहेको भन्दा धेरै आशा राखेको भन्दै आफ्नो कार्य क्षमतालाई सुधारेर युवा पुस्तालाई हस्तान्तरण गर्न पनि आग्रह गरे ।

मदनकृष्णले पनि समर्थन जनाउँदै लेखेका छन्, ‘देशले हरेक काल खण्ड पार गरेको पढेको छु र कति त आफैंले पनि भोगेको छु । आवाजलाई दबाएको देखेको छु, भोगेको छु  । नाताबाद देखेको देख्यै छु । कृपावाद देखेको देख्यै छु । सत्तामोह देखेको देख्यै छु र यसकै कारणले हजारौंको संख्यामा हरेक दिन युवाहरु रोजगारीको लागि विदेशिन बाध्य भइरहेको देखेको देख्यै छु र देखी नै रहेको छु । भ्रष्टाचारले चरम सीमा नै नाघेको त अहिले हाम्रो आँखा अगाडि छर्लङ्ग नै छ । अनि यही कारणले नेपाल आमा पनि रोइरहेको देखेको छु ।’

उनी थप्छन्, ‘युवाहरु देशका भविष्य हुन् । युवाहरुको सपना नै नेपाल आमाको सपना हो । बर्षौंदेखि देशले एउटा राम्रो गति लिन नसकेको देखेर हरेक नेपालीको मनमा उकुसमुकुस भएको छ ।  यहि उकुसमुकुस नै हो अहिलेको पुस्ता जेन्जीको यो अवाज । यो अवाज सुनिनुपर्छ । भ्रस्टाचारीहरु थुनिनुपर्छ । देशका हर नागरिकहरुको चाहना बुझ्ने नेता चुनिनुपर्छ ।अन्तमा देशको सपना बुनिनुपर्छ ।’

गायक तथा अभिनेता प्रकाश सपुतले त बिहीबार दुई भाइ सुनिल र सचिनलाई सडकमा ओर्लन आह्वान समेत गरेर । ‘जे होस भोलि तिमीहरु जानु । मैले तिमीहरूको ख़ातामा २५/२५ हजार रुपैयाँ पठाइदिएको छु । जुन गत महिना युटुबबाट कर काटेर आएको थियो । थाहा छैन अब आउँछ कि आउदैन ! अँ, त्यो पैसा ले पानी किनेर बाँड्नु र भन्नु साथीहरुलाई- –हाईड्रेड रहनु , संयमित रहनु, एकै पटकमा नथाक्नु ।’

अभिनेता तथा निर्देशक निश्चल बस्नेतले पनि टिकटकमार्फत् जेन्जी पुस्ताको आन्दोलनलाई समर्थन जनाए । उनले सत्ता र शक्तिको मात लागेपछि नेताहरूले सुन्न छाडेको र जनतालाई दबाउने नियम बनाइरहेको आक्रोश पोखे । ‘पहिला पनि कोही न कोहीले लिड गरिरहेको थियो । यो पटक कोही न कोहीले हैन  देशमै बसिरहेका युवाहरू, जो भर्खर भर्खर हुर्किँदैछन् र जसलाई आफ्नो भविष्यको चिन्ता छ । उनीहरू लागि परेका छन् । हामी प्रोटेस्ट गर्छौँ भनिरहेका छन् । उनीहरू आफ्नो भविष्यको लागि लडिरहेका छन् । प्रहरीहरूलाई पनि अनुरोध गर्दै कुनै घटना हुनबाट जोगाउनु होला,’ उनले भनेका छन् ।