काठमाडौँ — गीतकार कालीप्रसाद बाँस्कोटालाई थाहा थियो, ‘जालमा’ दर्शकको मुखैमा झुन्डिएको गीत हो । ‘पारि त्यो डाँडामा घाम लाग्यो घमाइलो...’ भन्ने स्थायी त दर्शकका मनमस्तिष्कमा यसरी स्थायी बनेर बस्यो कि ९ वर्षपछि पनि सबैलाई गीतका स्थायीदेखि अन्तरासम्म कन्ठै छ । यही पहिलो रेकर्डिङ (सोलो) ले नै कालीलाई सांगीतिक क्षेत्रमा स्थापित गरायो ।

गीतको चर्चा उतिबेला यति थियो कि यसले फिल्म नै छायामा पार्‍यो । कतिलाई यो गीत ‘रेशम फिलिली’ फिल्मको हो भन्ने नै थाहा थिएन । त्यसै पनि रिलिजकै भोलिपल्ट आएको २०७२ को भूकम्पले फिल्मको प्रदर्शन रोकिएको थियो ।

झन्डै एक दशकपछि फेरि यो फिल्मको सिक्वेल बनाउन तम्सियो, निर्माण टिम । निर्माता रौनक विक्रम कँडेलले ‘फेरि रेशम फिलिली’ बनाउने भन्दै कालीकहाँ यही गीतलाई पुनः सिर्जना गर्ने प्रस्ताव राखे ।

‘यो गीत त नर्सरी राइमजस्तै बनिसकेको थियो । कति जनाको नोस्टालजियासँग जोडिएको छ यो गीत । धेरै फेरबदल पनि गर्नु हुन्न भन्ने थियो । तर, नयाँ भाइभ दिनुपर्छ भन्ने थियो,’ कालीले आफ्ना सुरुवाती चुनौती पोखे । गीतलाई पूर्णतः नयाँ बनाउन उनी चाहन्थेनन् । तर, गीतकार मानस राजले त्यही अडियोका लागि शब्दहरू मिलाए । गीत रिलिजको अन्तिम समयसम्म पनि उनीहरू शब्द रचनामै घोत्लिरहे । ५/६ पटक शब्दहरू फेरबदल गरिरहे ।

उनीहरू गीतको पुरानै भावलाई ती शब्दहरूमा जोगाइरहन चाहन्थे । फिल्मको चरित्र हेर्दै ती भावलाई फेरि ब्युँताउने कोसिसमा लागे । जतिबेला फिल्मका चरित्रका लागि त्यो गीत लेखिएको थियो, अब त ती पात्रहरू पनि परिपक्व हुने भए नै । ९ वर्षपछि उनीहरूमा आउने भावना पनि केही फरक हुने नै भयो । त्यसैले काली र मानसले त्यही भावलाई मध्यनजर गरेर गीतमा काम गरे अनि शब्द रचना गरियो :

पूर्वैको बतासैमा कपाल फरर

राखन न सम्हाली जाली रुमाल...

‘पूर्वैको बतासैमा’ भन्ने शब्द मात्र मैले लेखेको हुँ । यो पटक सबै शब्दहरू मानसले नै लेख्नुभएको हो । ‘जालमा’ मा पनि दुई जनाले मिलेर शब्द लेख्यौं,’ काली सुनाउँछन् । खासमा त्यतिबेला कालीले ‘जालमा’ गीत अरू नै फिल्मका लागि तयार पारेका थिए । तर, उक्त प्रोजेक्टमा यो गीत प्रयोग नै भएन । त्यसपछि यो गीत ‘रेशम फिलिली’ का लागि दिए ।