कञ्चनपुर — थारू पहिरनमा सजिएकी २२ वर्षीया लक्ष्मी चौधरी ग्राहकलाई आफ्ना परम्परागत परिकारबारे बताइरहेकी छन् । घोंगी, ढिकरी, गंगटा, सुँगुरको मासु, सिद्रा र स्थानीय जातका कुखुराका विभिन्न परिकार उनले राखेकी छन् । ग्राहकको मागअनुसार परिकार दिन उनलाई भ्याइनभ्याइ छ ।

महेन्द्रनगरको खुलामञ्चमा चलिरहेको महोत्सवमा उनको परिवारले थारू समुदायको परिकारको स्टल राखेको हो । ८ कक्षा मात्रै पढेकी उनी आफ्नो व्यवसायमा भने पोख्त छिन् ।

कैलालीको टीकापुर नगरपालिका–१ शक्तिनगरकी लक्ष्मी यसरी महोत्सवमा जान थालेको चार/पाँच वर्ष भयो । दाङदेखि बाँके, बर्दिया, कैलाली र कञ्चनपुरलगायत जिल्लामा थारू परिकारको स्टल राख्दै आएकी छन् । मेला–महोत्सवमा थारू परिकारप्रति आकर्षण देखिन्छ । एउटा महोत्सवबाट एक/डेढ लाखसम्म बचत हुने लक्ष्मी बताउँछिन् । ‘जहाँ जहाँ मेला लाग्छ, त्यहाँ पुगिहाल्छौं,’ उनले भनिन्, ‘हाम्रा लागि आम्दानीको स्रोत यही हो ।’

कैलालीकै जोशीपुर–६ सिमरीका अनुराज चौधरीको पनि हिउँद मेला महोत्सवमै बित्छ । ‘आफ्नो समुदायका परिकारको प्रचारप्रसारसँगै आम्दानी पनि भइरहेको छ, यसमै सन्तुष्ट छु,’ उनले भने । उनले ५ वर्षदेखि विभिन्न जिल्लामा सञ्चालन हुने मेला महोत्सवमा स्टल राख्दै आएका छन् । अनुराजले एक सिजनमा यही पेसाबाट चार–पाँच लाखसम्म कमाउँछन् । त्यसैबाट घरपरिवार र बालबालिकाको पढाइको खर्च व्यवस्थापन हुन्छ ।