२१.१२°C काठमाडौं
‘मेरो गाउँ मेरो ठाउँ’ को मनोनयनमा ७० वृत्तचित्र
काठमाडौँ — पर्यटन विकासमा सघाउ पुर्याउने उद्देश्यले आयोजना गरिएको ‘मेरो गाउँ, मेरो ठाउँ’ भिडियो च्यालेन्ज प्रतियोगिता २०२३ का लागि विभिन्न १० विधामा ७० वटा वृत्तचित्र मनोनयनमा परेका छन् ।
देशैभरबाट पठाइएका कुल २५८ मध्येबाट ७० वृत्तचित्र मनोनयन गरिएको आयोजक वी विल राइज फाउन्डेसनका निर्देशक निर्मल श्रेष्ठले बताए ।
फाउन्डेसनले गत फागुन १२ देखि वैशाख २१ सम्म वृत्तचित्र आह्वान गरेको थियो । निर्णायक समूहले वेस्ट भिडियो अफ द इयर, जजेज च्वाइस अवार्ड, स्टोरी कन्सेप्ट/वेस्ट डिरेक्सन, वुमन भिडियो मेकर अफ दि इयर, फ्युचर स्टार अफ दि इयर, मोस्ट पोटेन्सियल डेस्टिनेसन, मोस्ट एर्नजेटिक भिडियो मेकर, वेस्ट स्क्रिप्ट/भ्वाइस ओभर, वेस्ट सिनेमाटोग्राफर र बेस्ट एडिटर गरी १० विधामा सात/सातवटा भिडियोलाई मनोनयन गरेको हो ।
मनोनयनमा परेकामध्ये उत्कृष्ट हुने बेस्ट भिडियो अफ द इयरले ५ लाख रुपैयाँ, जजेज च्वाइस अवार्डले २ लाख र बाँकी विधाका उत्कृष्ट वृत्तचित्रले १/१ लाख रुपैयाँ पाउनेछन् । फाउन्डेसनले पर्यटकीय सम्भावना भएर पनि ओझेलमा परेका प्राकृतिक तथा सांस्कृतिक सम्पदा, भेषभूषा, जातीय पहिचान, खानपान, कला संस्कृतिलगायत विषयवस्तुमा केन्द्रित वृत्तचित्रबीच प्रतियोगिता गर्दै आएको श्रेष्ठले बताए ।
प्रकाशित : जेष्ठ ७, २०८० ०७:०७
