काठमाडौँ — अमेरिकाको न्युयोर्क क्वीन्स, ज्याक्सन हाइट ७४ स्ट्रिट रुजभेल्ट एभिन्युको सव-वेबाट बाहिर निस्कना साथै भेटिन्छ विमला हमाल श्रेष्ठको नेपाली भान्छाघर । 'बिमाला दिदी'को यो भान्छाघरलाई विश्वकै प्रतिष्ठित मिडिया न्युयोर्क टाइम्सले उत्कृष्ट १०० रेष्टुरेन्टमा समावेश गरेपछि उनी मात्रै होइन समग्र नेपाली समुदाय उत्साहित छ । 

सन् २०१५ मा 'विमला दिदी'ले यो भन्छाघर सुरु गर्दा देशविदेशमा यसरी प्रसिद्धी पाइएला भनेर कहिल्यै नसोचेको बताइन् । तर, नेपाली खाना त्यसमाथि पनि मौलिकता झल्कने खानलाई प्रवर्द्धन गर्ने हुटहुटीले भने कहिल्यै नछोडेको उनी बताउँछिन् । 

उनी भन्छिन्, 'खाना अनि त्यसका विभिन्न परिकारले जातीय र क्षेत्रीय पहिचानमात्र स्थापित गर्दैन । परिकारको विविधताले कुनै पनि मुलुकको सभ्यता तथा मौलिकतालाई चिनाउने रहेछ ।' अमेरिका त्यसमाथि पनि न्युयोर्क जस्तो सहरमा खोलिएका धेरै नेपाली रेस्टुरेन्टले खानाको स्वादसँगै नेपाल परिचय व्यापक बनाइरहेको उनको अनुभव छ । 

नेपाली समुदायमा विमला दिदी भान्छाघरको रूपमा परिचित हमालको यो रेस्टुरेन्टले न्युयोर्क सिटीमा हुने म:म प्रतियोगितामा कैयन् पटक पुरुस्कार जितिसकेको छ । यहाँको नेपाली समुदायले पनि उनलाई अगुवाहरू एवं अभिभावकको रुपमा मान्ने गरेका छन् ।

११ वर्षअघि सुरु भएको नेपाली भान्छाघरमा नेपालीका प्रिय परिकार सेल रोटीदेखि म:म, चाउमिन तथा भुटन सुकुटी सर्वाधिक मन पराइएका परिकार हुन् । भान्छाघर स्थापनाका सुरुका दिनमा उनले नेपाली सेल रोटी 'कम्प्लिमेन्ट्रि' रुपमा ग्राहकलाई खुवाइन् । त्यही सेल रोटीले ग्राहक तान्न सहयोग गरेको उनको अनुभव छ । अहिले उनको भान्छाघरमा आउने नेपालीले थाली धेरै मन पराउने गरेका छन् । अझ हातै खाना खान मन पराउनेहरू उनको रेष्टुरेण्टमा पुग्ने गरेको सुनाइन् ।