कतारमा ८० प्रतिशत कामदारलाई घरबाटै काममा लगाइने, सनैयाको लकडाउन थपियो
काठमाडौँ — कतार सरकारले निजी क्षेत्रका ८० प्रतिशत कामदारलाई बिहीबारदेखि घरबाटै काममा लगाउने निर्णय गरेको छ । उनीहरूको काम गर्ने अवधिलाई ६ घण्टा कायम गरिएको छ । बिहान ७ बजेदेखि दिउँसो १ बजेसम्म मात्रै काम गर्ने समय तोकिएको छ । यो दुई हप्ताका लागि लागु हुनेछ ।
प्रधानमन्त्री तथा आन्तरिक मामिलामन्त्री शेख खालिद बिन खालिफा बिन अब्दुलाजीज अलथानीको अध्यक्षतामा बुधबार साँझ बसेको मन्त्रीस्तरीय बैठकले यो निर्णय गरेको हो ।
अब रोजगारदाताले २० प्रतिशत कामदारलाई मात्रै कार्यालयमा काममा लगाउन पाइनेछ । तर, खाद्यान्य, औषधि र घरघरमा खाना पुर्याउने रेष्टुरेन्टको लागि भने यो नियम लागू हुने छैन ।
सरकारले विभिन्न सरसफाइ कम्पनीबाट घरको काम गर्न पठाउने कार्यलाई समेत रोकेको छ । कतारमा विभिन्न कम्पनीले महिलालाई घण्टा वा दिनभर घरेलु कामको लागि घरघरमा पठाउँदै आएको थियो । यसमा नेपाली महिलाको बाहुल्यता छ ।
कामदार बोक्ने बसले सिट क्षमता अनुसार कामदारलाई बोक्न पनि रोक लगाएको छ । त्यस्तो बसले सिट क्षमताको आधा मात्रै कामदार बोक्न पाइनेछ ।
अत्यावश्यक सेवा र राष्ट्रिय निर्माण आयोजनामा काम गर्ने कम्पनीको लागि भने नयाँ निर्णय लागू नहुने बताइएको छ ।
सनैयाको लकडाउन बढ्यो
कतारले झन्डै ५० हजार नेपालीसहित आप्रवासी कामदार बस्ने सनैयाको लकडाउनको समयावधि बढाएको छ । सनैयाको सडक नम्बर १ देखि ३२ सम्मको क्षेत्रलाई सिल गर्दै लकडाउन गरेको थियो ।
मन्त्रीस्तरीय बैठ्कपछि आयोजित पत्रकार सम्मेलनमा उच्चस्तरीय संकट व्यवस्थापन समितिका प्रवक्ता लोलवाह विन्ट रसिद विन मोहम्मद अल खतिरले कतार र कामदारको सुरक्षाका लागि लकडाउनको अवधि बढाइएको बताइन् ।
त्यो क्षेत्रमा कार्यरत कामदारलाई कोरोना भाइरसको संक्रमण देखिएपछि कतारले निकै संवेदनशील रूपमा राख्दै आवतजावतलाई पूर्ण नियन्त्रण गरी कामदारको स्वास्थ्य परीक्षण गरिरहेको प्रवक्ता खतिरले बताइन् । यो क्षेत्रभित्र रहेका कामदारलाई खाद्यान्नको अभाव हुन नदिइएको र तीन ठाउँमा मोबाइल जाँच केन्द्रमा परीक्षण भइरहेको छ ।
थप ५४ जनामा कोरोना संक्रमण
कतारमा बुधबार मात्रै ५४ जनामा कोरोना भाइरसको संक्रमण देखिएको छ ।
समितिका अनुसार कोरोना संक्रमितको सख्या ८ सय ३५ पुगेको छ । ७१ जनालाई निको भएको छ । दुई जनाको मृत्यु भएको छ । कतारमा अहिलेसम्म २४ हजार ८ सय २५ जनाको स्वास्थ्य परीक्षण भएको छ ।
कतारका लागि नेपाली राजदूत नारदनाथ भारद्वाजले कोरोना भाइरस नियन्त्रणको लागि कतार सरकारले लिएका मापदण्डलाई कडाइका साथ पालना गर्नको लागि नेपाली समुदायलाई आग्रह गरेका छन् ।
कतारमा तीन लाख ५१ हजार नेपाली कार्यरत छन् ।
यसैबीच कतार रेडक्रससँगको समन्वयमा गैरआवासीय नेपाली संघ कतारले खाद्यान्नको अभाव झेलिरहेका कामदारलाई खाद्यान्न वितरण गरिरहेको छ । संघका अध्यक्ष मुक्तदा मुसलमानले खानाको अभाव भएमा संघलाई खबर गर्न अनुरोध गरेका छन् ।
प्रकाशित : चैत्र २०, २०७६ ०८:१८