अध्यक्ष वैद्यले भनिन्, ‘हामीले विद्युतीय सवारीसाधनको आयातसँगै देखिएको नयाँ अवसरलाई उपयोग गर्दै सीटीईभीटी र शिक्षा मन्त्रालयसँग सहकार्यमा सीप विकासमा लगानी बढाइरहेका छौँ। युवाहरूलाई रोजगारी योग्य बनाउन आवश्यक सीप दिने उद्देश्यले श्रम शक्ति विकास अभियानमा नाइमा सक्रिय रूपमा लागेको छ। ’

उनले नाइमा अटोमोबाइल आयातकर्ता तथा उत्पादकहरूको साझा आवाजका रूपमा कार्य गर्दै आएको बताइन् । गुणस्तरीय सेवा, जनशक्ति विकास र सहरदेखि गाउँसम्म सवारीसाधन तथा सेवा पहुँच पुर्‍याउने दिशामा नाइमाले आगामी दिनमा काम गर्ने अध्यक्ष वैद्यको भनाइ छ।

बुधबारदेखि सुरु भएको नाइमा मोबिलिटी एक्स्पो २५ गतेसम्म काठमाडौँको भृकुटीमण्डपस्थित प्रदर्शनी स्थलमा आयोजना हुनेछ। एक्स्पोमा ५० भन्दा बढी ब्रान्डको सहभागिता रहेको नाइमाले जनाएको छ।

एक्स्पोमा १५ दुई पाङ्ग्रे, १५ चार पाङ्ग्रे र ५ व्यावसायिक नयाँ सवारीसाधन सार्वजनिक गरिनेछ। यस प्रदर्शनीस्थलमा अपाङ्गमैत्री संरचना, सुधारिएको ढल निकास व्यवस्था र सुरक्षा तथा आपत्कालीन सेवाको व्यवस्था मिलाइएको नाइमाले जनाएको छ।