काठमाडौँ — घोराही उपमहानगरपालिकाका प्रमुख नरुलाल चौधरीले अब घोराहीमा डोकामा बिरामी ओसार्ने बाध्यता नरहेको बताएका छन्। १९ वडा रहेको यो उपमहानगरपालिकामा सबै क्षेत्रमा सडक सञ्जाल विस्तार भइसकेको र एम्बुलेन्स सेवाले सहजता प्रदान गरेको उनले बताए ।

'विगतमा बिरामी डोकामा ओसार्नुपर्ने बाध्यता थियो। अहिले विकासमा धेरै फड्को मारेका छौँ। अहिले सबै ठाउँमा बाटो पुर्‍याएका छौँ। एम्बुलेन्स पुगेको छ,' कान्तिपुर मिडिया ग्रुपले बुधबार भैरहवामा आयोजना गरेको ‘लुम्बिनीको सामर्थय’ विषयक अन्तर्क्रिया कार्यक्रमको 'दोस्रो सत्र : उपमहानगरको उन्नति’ शीर्षकमा बोल्दै चौधरीले भने, 'अब डोकामा बिरामी ओसार्नुपर्ने बाध्यता अन्त्य भयो।'

सडक जस्तै अन्य क्षेत्रमा पनि धेरै विकास भएको उनले बताए। चौधरीका अनुसार विगतमा घोराही सुख्खा क्षेत्र थियो। वर्षातको बेला मात्रै खेतीपाती हुन्थ्यो।

'बहुउद्देश्य हिसाबले पानी जम्मा गरेर विकास, समृद्धि र रोजगारी सिर्जना गर्न अगाडि बढ्यौँ। अहिले ४३ वटा कृत्रिम जलाशय निर्माण भएको छ। लिफ्ट सिँचाइ र सतह सिँचाइ पनि हुन्छ,' चौधरीले भने, 'ठूला जलाशयमा ११ किलोसम्मका माछा छन्।'

त्यस्तै, जलाशयको वरिपरि पर्यटक आउने र ती क्षेत्रमा होटल पनि सञ्चालनमा आएको उनले बताए। 'विदेश जाने युवा स्वदेशमै तरकारी खेतीमा लागेका छन्। विदेश जाने संख्या पनि घटेको छ,' उनले भने, 'यी मात्रै होइनन्, जलाशयले जमिनलाई रिचार्ज गरेको छ। डिप बोरिङ र इनार पनि सुकेका छैनन्। खानेपानीमा सहयोग पुगेको छ। जलवायु परिवर्तनमा पनि सन्तुलन ल्याएको छ।'

ठूला खोलाहरू थुनेर ढुंगा, गिटी, बालुवा, र पानीको सदुपयोग गर्न सकिने घोराहीको अवधारणा रहेको उनले बताए। 'अगाडिबाट थुनेपछि गगर्यान आएर अडिन्छ। १२ महिना प्रयोग गर्न सकिन्छ। भारततिर बग्ने बालुवा, गिटी पनि प्रयोग गर्न सकिन्छ। बाँध बनाएर पानीको सदुपयोग गरेर माछा उत्पादन र रोजगारी सिर्जना गर्न सकिन्छ भन्ने हाम्रो अवधारणा हो,' उनले भने।