पर्सा — कन्टेनर लोडअनलोड गर्ने दुइटा ‘रिचस्टेकर’ उपकरण बिग्रँदा वीरगन्जस्थित सिर्सिया सुक्खा बन्दरगाह अस्तव्यस्त बनेको छ । रेलवे र्‍याकबाट कन्टेनर लोडअनलोड गर्ने चार रिचस्टेकरमध्ये दुई बुधबारदेखि एकसाथ बिग्रिएका छन् । चालु अवस्थामा रहेका दुई रिचस्टेकरमध्ये एउटा जीर्ण रहेकाले त्यो पनि जुनसुकै बेला थन्किन सक्छ ।

लकडाउनमा पनि चलिरहेको बन्दरगाह मालवाहक कन्टेनर तथा अन्य बल्क कार्गोले भरिएको इन्टरमोडल यातायात विकास समिति वीरगन्जका प्रमुख कमल ज्ञवालीले जानकारी दिए । बन्दरगाहको यार्डमा मालवस्तु बोकेका ३ हजार २ सय ‘लोडेड’ कन्टेनर छन् । यसबाहेक भारतका बन्दरगाहमा फिर्ता पठाउनुपर्ने चार सय थान खाली कन्टेनर पनि यार्डमा छन् ।

भारतका विभिन्न बन्दरगाहबाट कन्टेनर बोकेर हिँडेका २० रेलवे र्‍याक उतैका विभिन्न स्थानमा छन् । तिनमा १ हजार ८ सय कन्टेनर रहेको उनले बताए । भारतको विशाखापट्टनम बन्दरगाहमा वीरगन्ज आउन २ हजार ५ सय मालवाहक कन्टेनर प्रतीक्षारत छन् । कोलकाता बन्दरगाहमा पनि २ सय ८० यस्ता कन्टेनर वीरगन्ज आउन नपाएर रोकिएका छन् । ५ हजार मेटन बोरा बन्द कार्गो सामान र ४ हजार मेटन फलाम पनि बन्दरगाहमा थुप्रिएको छ ।

बन्दरगाह सञ्चालन गरिरहेको ठेकेदार कम्पनी हिमालयन टर्मिनल्सले उचित व्यवस्थापन नगर्दा यस्तो समस्या आएको सरोकारवालाहरूको गुनासो छ । ठेक्काको अन्तिम चरणमा रहेको टर्मिनल्स व्यवस्थापनले उदासीनता देखाएकैले यस्तो अवस्था सिर्जना भएको भन्सार एजेन्ट श्यामबाबु पटेल बताउँछन् । ‘निरन्तर एक दशकभन्दा बढी समय बन्दरगाह चलाइरहेको टर्मिनल्सले अब ठेक्का नपाउने निश्चित रहेकाले उसले व्यवस्थापनमा लापरबाही गरिरहेको हो,’ उनले भने ।

इन्टरमोडल यातायात विकास समिति प्रमुख ज्ञवालीले भने हिमालयन टर्मिनल्सलाई सक्दो छिटो बिग्रिएका रिचस्टेकर उपकरण मर्मतसम्भार गरी पुन: सञ्चालन गर्न आफूले दबाब दिइरहेको बताउँछन् । बिग्रिएका रिचस्टेकर उपकरण बनाउन भारतबाट दुई जना प्राविधिक आइसकेको र उनीहरूले सक्दो प्रयास गर्दा पनि उपकरण मर्मत हुन नसकेको हिमालयन टर्मिनल्सका वित्त प्रमुख एवं सूचना अधिकृत अनिमेश कुमारले बताए ।