हेटौंडा — बागमती प्रदेशमा रास्वपाले प्रत्यक्षतर्फका उम्मेदवारले पाएको भन्दा समानुपातिकतर्फ धेरै मत पाएको छ ।

बागमती प्रदेश निर्वाचन आयोग कार्यालयका अनुसार रास्वपाले बागमती प्रदेशबाट समानुपातिकतर्फ ११ लाख १९ हजार २७० मत पाएको छ । यो प्रदेशमा ३३ वटा निर्वाचन क्षेत्र रहेका छन् । ३३ वटै क्षेत्रमा रास्वपाले उम्मेदवार उठाएको थियो ।

त्यसमध्ये ३१ क्षेत्रमा रास्वपाका उम्मेदवारले चुनाव जिते । २ क्षेत्रमा पराजित हुन पुगे । सिन्धुपाल्चोक–२ मा नेकपाका युवराज दुलाल र रसुवामा कांग्रेसका मोहनप्रसाद आचार्य विजयी भएका छन् ।

रास्वपाका सबै उम्मेदवारले पाएको मत जोड्दा ९ लाख ६० हजार ३११ हुन्छ । यो समानुपातिकतर्फको मतभन्दा कम हो ।

बागमती प्रदेशमा रास्वपाले समानुपातिकतर्फभन्दा प्रत्यक्षमा कम मत पाउँदा कांग्रेस र एमालेको अवस्था ठीक उल्टो छ । कांग्रेसका प्रत्यक्षतर्फका उम्मेदवारहरूले पाएको कुल मत ३ लाख ६७ हजार ४९१ छ । यो प्रदेशबाट कांग्रेसले समानुपातिकतर्फ पाएको मत भने ३ लाख २१ हजार १०६ छ ।

एमालेको अवस्था पनि कांग्रेसको जस्तैं छ । एमालेका उम्मेदवारहरूले पाएको मत जोड्दा ४ लाख ८८ हजार ८६३ पुग्छ । तर, एमालेले यो प्रदेशबाट समानुपातिकतर्फ भने २ लाख ६१ हजार ८९७ मत पाएको छ ।