काठमाडाै उपत्यका बाहेकका जिल्लामा कम्तीमा २५ जना बेपत्ता
हेटाैडा — बाढीपहिराको कारण वाग्मती प्रदेशका १३ जिल्लामा परेर २१ जनाको मृत्यु भएको छ । वाग्मती प्रदेश प्रहरी कार्यालय हेटौंडाका अनुसार उपत्यकाका तीन जिल्लाबाहेक पछिल्लो २४ घण्टामा बाढी पहिरोका कारण २१ जनाको मृत्यु भएको हो ।
प्रदेश प्रहरी कार्यालय हेटौंडाका अनुसार शनिबार अपराह्न ४ बजेसम्म बाढीपहिरोका कारण सबैभन्दा धेरै काभ्रेमा १० जना, सिन्धुपाल्चोकमा ६, दोलखामा ३ तथा धादिङ र सिन्धुलीमा १/१ जनाले ज्यान गुमाएका हुन् ।
बिहीबारदेखिको वर्षाका कारण आएको बाढीपहिरो कारण प्रदेशको काभ्रे, सिन्धुली, दोलखा, सिन्धुपाल्चोक र धादिङमा मानवीय क्षति भएको प्रदेश प्रहरी कार्यालय हेटौंडाका प्रहरी नायव उपरीक्षक जितेन्द्र बस्नेतले जनाए ।
बाढीपहिरोका कारण काभ्रेमा ११ जना बेपत्ता भएका छन् । त्यस्तै, धादिङमा ३, सिन्धुपाल्चोकमा ४ र मकवानपुरमा ७ जना जना बेपत्ता भएका छन् ।
बाढी पहिरोका कारण प्रदेशमा ५९ वटा भौतिक संरचनामा पूर्ण क्षति पुगेको छ भने १० वटामा आंशिक क्षति भएको प्रहरीले जनाएको छ । बाढी पहिरोले मकवानपुरमा २८ र काभ्रेमा ११ वटा भौतिक संरचना पूर्ण क्षति पुगेको हो ।
प्रदेशमा बाढी पहिरोको जोखिममा रहेका १ सय ९२ परिवारलाई उद्धार गरेर स्थानान्तरण गरिएको छ । काभ्रे, दोलखा र मकवानपुरका गरी ३९ घर र कार्यालय उच्च जोखिममा छन् ।
प्रदेश प्रहरी कार्यालय हेटौडाका अनुसार प्रदेशमा बाढी पहिरोमा परेका र उच्च जोखिममा रहेको खोजी तथा उद्धारका लागि १० जिल्लामा ४ हजार १ सय ११ जना प्रहरी परिचालन गरिएको छ । बाढीपहिरोले १० जिल्लाका ३७ राजमार्ग र सडकहरू अवरुद्ध भएका छन् ।
