काभ्रे — पाँच दलीय गठबन्धनले बेथानचोक गाउँपालिकलाई १० वर्षभित्र सबै क्षेत्रमा आत्मनिर्भर बनाउने लक्ष्यसहितको प्रतिबद्धता–पत्र सार्वजनिक गरेको छ । पाँच वर्षे कार्यकालमा गर्ने विकासका खाकासहित दीर्घकालीन योजना सार्वजनिक गरेको हो ।

प्रतिबद्धता–पत्रमा १० वर्षमा सबै क्षेत्रमा आत्मनिर्भर बनाउने अठोट गर्दै एक घर एक रोजगारी, एक टोल एक कृषि फर्म, एक वडा एक उद्योग, सम्भावयता हेरेर पर्यटकीय आवास गृह  खोल्ने उल्लेख छ । ५ वर्षभित्र धुम्रपानरहित गाउँपालिका घोषणा गर्ने लक्ष्य गठबन्धन दलको छ । गाउँपालिकामा एक कृषि क्याम्पस, ढुंखर्क–हेटौंडा जोड्ने वैकल्पिक राजमार्ग, विपन्न परिवारलाई एकीकृत आवास निर्माण  गर्ने महत्त्वाकांक्षी योजना पनि प्रतिबद्धता–पत्रमा उल्लेख छ । 

बढीमा २० मिनेटको दूरीमा विद्यालय, एक टोल एक शिशु स्याहार केन्द्र, बहुप्राविधिक शिक्षालय स्थापना गर्ने लक्ष्य लिएको गठबन्धनले एमबीबीएस, इञ्जिनियरिङ, वन विज्ञान, आयुर्वेद, एमफिल, पिएचडीलगायत अनुसन्धान गर्ने अन्यलाई पनि अनुदान उपलब्ध गराउने घोषणा गरेको छ । गाउँपालिकावासी सबैलाई स्वास्थ्य विमा सहभागी गराउने सोच बनाएको गठबन्धनले १५ मिनेटभित्र एम्बुलेन्स उपलब्ध हुने गरी ग्रामीण एम्बुलेन्स सेवा सुरु गर्ने जनाएको छ ।