काठमाडौँ — तीन महिनाको बच्चाको पेटमा अर्को बच्चा ! सुन्दै पनि अपत्यारिलो लाग्ने ३२ वर्षअघिको उक्त घटना कान्ति बाल अस्पतलमा देखिएको थियो । सालनालसहित हातखुट्टा र मेरुदण्डसहितको शरीर विकसित भएको छोराका रूपमा रहेको उक्त बच्चा भेटिएपछि चिकित्सकहरूले यसलाई विश्वमा हुने एक–दुईवटा घटनामध्येको भएको बताएका थिए ।

तीन महिनाको एक बच्चा कान्ति बाल अस्पतालमा उपचारार्थ भर्ना गरिएको थियो । शल्यक्रिया गरेर अचम्मको बच्चा निकालिएको थियो । शल्यक्रिया गरिएका तीन महिनाका सूर्यलाल खुलालको स्वास्थ्यमा भने सुधार भयो । खुलाल बारास्थित आफ्नै घरमा निजगढ रोड टोलमा २०५१ असोज १७ मा जन्मेका थिए । 

खुलालका बुवा/आमा खड्गबहादुर खुलाल र लक्ष्मीले बच्चा जन्मदा पेट केही ठूलो भएको बताएका थिए । ‘दूध खुवाएपछि पेट बढ्न थाल्यो । उसले दूध खाइरहन्थ्यो,’ आमा खुलालले भनेकी थिइन् । दुध खुवाएपछि पेट फुल्ने र ढाडसम्म पुग्ने भएकाले बच्चालाई वीरगन्जस्थित चिकित्सक कृष्णकुमार अग्रवालकहाँ पुर्‍याइएको थियो । अग्रवालले पेटभित्र मासु पलाएको अनुमान गरेर मेघाकोलन भन्ने रोग लागेकाले काठमाडौं लगेर शल्यक्रिया गर्न सुझाएका थिए ।

काठमाडौंस्थित बाल अस्पतालमा भर्ना गरेको ९ दिनपछि मात्र चिकित्सक केशवबहादुर राजभण्डारी र कृष्णप्रसाद देवकोटाले स्वास्थ्य परीक्षण गरेका थिए । उनीहरूले मृगौलाको एक्सरे गरेपछि बालकको पेटमा पानीको थैलो भएको र त्यहाँ मासुको डल्लो रहेको अनुमान गरेका थिए । शल्यक्रियाका क्रममा बच्चाको पेटमा बच्चा नै फेला परेपछि चिकित्सहरू पनि अचम्मित भएका थिए ।