काठमाडौँ — २०५१ साउन ५ मा एमालेसहित ६ वाम घटकले  आयोजना गरेको नेपाल बन्द हिंस्रक बनेको थियो । आन्दोलनका क्रममा बन्द आह्वानकर्ता समूहका कार्यकर्ताले रत्नपार्क, भोटाहिटी, महाबौद्ध, न्युरोड, पुरानो बसपार्कलगायत क्षेत्रमा भौतिक संरचना तोडफोड गरेका थिए ।

प्रहरीले अश्रुग्यास प्रहार गर्ने, लाठीचार्ज गर्ने, पानीका फोहरा छाड्ने जस्ता कारबाही गरेर आन्दोलनकारीलाई तितरबितर पारेको थियो । विरोध प्रदर्शन चर्किंदै गएपछि प्रहरीले गोली प्रहार गरेको र राजधानीमा आन्दोलनरत दुई जना घाइते भएको जानकारी मानव अधिकार पर्यवेक्षण समितिले दिएको थियो ।

एमाले महासचिव माधव कुमार नेपालले काठमाडौंमा हवाई फायर भएको बताएका थिए । गृह मन्त्रालयका प्रवक्ता श्रीकान्त रेग्मीले आन्दोलनकारीले टेलिफोन क्याबिनेटमा आगो लगाउने, रेलिङ भाँच्ने र ढुंगा हान्ने गरेकाले सार्वजनिक सम्पत्ति जोगाउन अश्रुग्यास प्रहार गरेको दाबी गरेका थिए । आन्दोलनकारीले राजधानीलाई तनावग्रस्त बनाएको रेग्मीले जानकारी दिएका थिए । गृह मन्त्रालयले मुलुकभर २५ वटा सवारी साधनमा क्षति पुगेको, बसपार्कस्थित चुंगीकर चौकीमा आगो लगाएको, काठमाडौं नगरपालिकाको नक्सा कार्यालयको सिसा फुटाएको, जुद्ध शालिकवरिपरि गमला फुटाएको, भोटाहिटी सव–वेको फलामे गेटभत्काएको बताएको थियो । जुलुसले दरबारमार्गस्थित राजा महेन्द्रको शालिकलाई केही समय घेरेर राखेको थियो । जुलुसमा राजतन्त्रविरोधी नारा पनि लगाइएको थियो ।