काठमाडौँ — कांग्रेसका तत्कालीन महामन्त्री महेन्द्रनारायण निधिले मुलुकमा मध्यावधि निर्वाचन लाद्न दरबार र प्रधानमन्त्री गिरिजाप्रसाद कोइरालाको साँठगाँठ रहेको दाबी गरेपछि मुलुकको राजनीति एकाएक गर्माएको थियो । उनले त्यसै सन्दर्भमा एमालेले सुरु गरेको कोइरालाविरोधी आन्दोलनमा कांग्रेस पनि सहभागी भई संयुक्त आन्दोलन चर्काउनुपर्ने बताएका थिए ।

२०५१ असार ३० मा कान्तिपुरका जनकपुर संवाददाता रामभरोस कापडीलाई दिएको अन्तर्वार्तामा महामन्त्री निधिले उक्त कुरा बताएका हुन् । ‘अब कोइरालालाई पदमा बस्ने अधिकार छैन,’ उनले भनेका थिए । मध्यावधि निर्वाचनलाई सुनियोजित बताउँदै निधिले ‘२०४८ मा भएको पार्टीको झापा महाधिवेशनदेखि नै पार्टी र सरकारबीच फाटो रहेको’ धारणा पनि सार्वजनिक गरेका थिए । 

कलबलगुडी महाधिवेशनमा गणेशमान र कोइरालाबीच मनमुटाव देखिएको थियो । गणेशमानले कलबलगुढीमा भाषणका क्रममा सरकार सञ्चालन र कोइरालाको कार्यशैलीप्रति असन्तुष्टि जनाएका थिए । विगतका प्रसंग कोट्याउँदै निधिले प्रतिनिधिसभामा मतदान हुँदा अल्पमतमा परेपछि प्रधानमन्त्री कोइरालालाई अब पदमा बस्ने अधिकार नभएको उनको भनाइ थियो । उनले एमालेको आन्दोलन अब संयुक्त रुपमा चलाउनुपर्ने बताउँदै कथंकदाचित आन्दोलन कमजोर भएर निर्वाचन भयो भने पनि कांग्रेसले बहिष्कार गर्नुपर्ने बताएका थिए । राजा र गिरिजाप्रसादले चुनावको विषयमा अझै पनि पुनर्विचार गर्नुपर्ने माग उनको थियो । 

अन्तर्वार्ताका क्रममा उनले गिरिजाप्रसादको पक्षमा लाग्ने अधिकांश सांसद अन्तरघाती भएको बताएका थिए । ३६ जना सांसदलाई कारबाही हुन्छ त भन्ने प्रश्नमा निधिले गिरिजाको समर्थक सांसदलाई कारबाही गर्नुपर्ने बताएका थिए । 

२०५० माघमा भएको काठमाडौं–१ को उपनिर्वाचनमा सभापति कृष्णप्रसाद भट्टराईलाई हराएको प्रति संकेत गर्दै निधिले ती सांसदलाई अन्तरघातीको संज्ञा दिएका हुन् । ‘उनीहरूमाथि कारबाही स्थगित मात्र भएको हो,’ निधिले भनेका थिए । उनले कांग्रेसलाई सरकार चलाउने अवसर दिनुपर्ने भन्दै त्यो अवस्था नआए विपक्षीसँग मिल्नुपर्ने बताए । विपक्षीसँग मिल्दा पनि नभएमा सर्वदलीय सरकार बनाउनुपर्ने उनको माग थियो । 

प्रधानमन्त्री गिरिजाप्रसाद कोइरालाको सिफारिसमा राजा वीरेन्द्रले २०५१ कात्तिक २७ मा मध्यावधि निर्वाचन हुने घोषणा गरेका थिए । तर वामपन्थी दल कोइरालालाई हटाएर सर्वदलीय सरकार गठन गर्नुपर्ने पक्षमा आन्दोलनरत थिए । सत्तारुढ पार्टी कांग्रेसको आन्तरिक कलह चुलिएका कारण गणेशमानले पनि एमालेको आन्दोलनलाई नैतिक समर्थन गरेको बताइन्थ्यो ।