काठमाडौँ — पोखरामा सञ्चारकर्मीहरूसँग कुराकानी गर्दै नेपाली कांग्रेसका सर्वोच्च नेता गणेशमान सिंहले भनेका थिए, ‘अब पार्टी विभाजनको बिन्दुमा पुगेको छ ।’ उनले पार्टी विभाजनको घोषणा मात्र हुन बाँकी रहेको उद्घोष पनि गरे । 

खासगरी प्रधानमन्त्री गिरिजाप्रसादसँगको मनमुटावले गणेशमानले यसअघि नै आफू पार्टीमा बस्नै नसक्ने अवस्थामा पुगेको सार्वजनिक अभिव्यक्ति दिएका थिए । त्यसको केही दिनपछि पोखरामा उनले कांग्रेसमा ३६ जना सांसदले कोइराला नेतृत्वको सरकारले पेस गरेको बजेट स्विकृत नगरी सरकार ढाल्ने प्रयास हुने बताएका थिए । कुराकानीका क्रममा उनले भनेका थिए, ‘स्वेच्छाचारीताबाट प्रजातन्त्र दिगो रहँदैन । प्रजातन्त्रको संरक्षण गर्न आफू लागिरहन्छु ।’

नेपाल पत्रकार महासंघ कास्कीले २०५१ वैशाख २३ मा आयोजना गरेको भेटघाट कार्यक्रममा गणेशमानले पञ्चायतकालमा सिंहदरबार जल्दा र रंगशालामा मान्छेको मृत्यु हुँदा नैतिकताका आधारमा राजीनामा दिएको प्रसंग जोड्दै अहिले कानुन मिच्दा पनि राजीनामा निदिएको बताएका थिए । 

विशेषतः टनकपुर सम्झौतालाई अदालतले सन्धि भनेपछि कोइरालाले प्रधानमन्त्री पदबाट राजीनामा दिनुपर्ने उनको तर्क थियो । भारतसँग २०४९ मा भएको टनकपुर परियोजनासम्बन्धी सम्झौतालाई कोइरालाले समझदारी भनेका थिए । तर सर्वोच्च अदालतले टनकपुर सम्झौतालाई सन्धि नै भएको व्याख्या गरेपछि प्रधानमन्त्रीबाट राजीनामा दिनुपर्ने तर्क गणेशमानको थियो । उनले आफूले पार्टी सभापति कृष्णप्रसाद भट्टराईलाई कोइरालामाथि कारबाही गर्न अनुरोध गरे पनि नटेरेको पनि बताएका थिए ।