काठमाडौँ — २०४६ को राजनीतिक परिवर्तनपछि नेपाली कांग्रेसको निर्वाचित सरकार गठन भएको तीन वर्ष पूरा हुँदै थियो । सरकार गठन भएदेखि नै गिरिजाप्रसाद कोइरालाको नेतृत्वमा रहेको कांग्रेस र प्रमुख प्रतिपक्षी एमालेबीच अस्वाभाविक द्वन्द्व चर्किरहेको थियो । कोइराला सरकारका विरुद्ध एमाले निरन्तर सडक संघर्षमा थियो ।

नेपाल कम्युनिस्ट पार्टीको ४५ औं वार्षिक उत्सवको अवसर पारेर २०५० वैशाख ९ मा एमाले काठमाडौं विशेष क्षेत्रीय समितिले महँगी र भारतीय प्रहरीको हस्तक्षेपको विरोधमा एक कार्यक्रम आयोजना गरेको थियो ।

सोही कार्यक्रममा प्रतिनिधिसभामा प्रमुख प्रतिपक्षी नेता तथा एमालेका तत्कालीन अध्यक्ष मनमोहन अधिकारीले कांग्रेस भारतपरस्त भएको आरोप लगाउँदै त्यस पार्टीभित्रको झगडालाई सैद्धान्तिक नभइ कुर्सी, कमिसन र पैसाका लागि भएको बताउँदै यो समस्या समाधान नभएसम्म आफूहरूले सडक संघर्ष नछाड्ने भएका थिए । प्रधानमन्त्री गिरिजाप्रसाद कोइराला र गणेशमान सिंहबीचको द्वन्द्व सतहमा आएका बेला अधिकारीले कांग्रेसमाथि यस्तो आरोप लगाएका थिए । 

२०५० जेठ ३ मा चितवनको दासढुंगामा भएको जीप दुर्घटनामा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रितको मृत्यु भएको थियो । उक्त घटनालाई एमालेले पार्टीका नेता केपी शर्मा ओलीको अध्यक्षतमा छानबिन आयोग गठन गरेर दासढुंगा दुर्घटना नभएर षड्यन्त्र भएको बताएको थियो । उक्त घटनाको छानबिन गर्न बेवस्ता गरेको भन्दै विशेषतः सत्तारुढ कांग्रेस र कोइराला नेतृत्वको सरकारका विरुद्ध सडक तथा सदनमार्फत एमालेले आन्दोलन गरिरहेको थियो ।