ग्रेटाको अभियानमा १५ लाख सहभागी

थनवर्गले २०१८ को अगस्टमा १५ वर्षको उमेरमा उक्त अभियानको घोषणा गरेकी थिइन् । भावी सन्ततिका लागि पृथ्वीलाई बचाइराख्न मानिसहरूको भौतिकवादी जीवनशैलीमा परिवर्तन ल्याउनुपर्ने भन्दै भविष्यका लागि शुक्रबार एक दिनको समय दिनुपर्ने भन्दै उनले ‘फ्राइडेज फर फ्युचर’ अभियान चलाएकी हुन् । जलवायु परिवर्तनले पारेको असर र प्रभाव न्यूनीकरणका लागि शक्ति राष्ट्रलाई दबाब दिन विश्वभरका विद्यार्थीहरूलाई एकीकृत पार्न आफूले अभियान सुरु गरेको ग्रेटाको भनाइ छ ।

अभियान सुरु गरेसँगै हरेक शुक्रबार विद्यालय नगई उनी स्वीडेनको संसद् भवन अगाडि प्लेकार्डसहित विरोध प्रदर्शन गर्ने गर्थिन् । सुरुवाती दिनमा थनवर्गसँगै उभिने कोही हुँदैनथ्यो । तर ३ महिनाभित्रै उनको ‘स्कुल स्ट्राइक’ मा भने २४ युरोपेली मुलुकका १७ हजारभन्दा बढी विद्यार्थी जोडिइसकेका थिए ।

एक वर्ष नपुग्दै अभियानका कारण निकै चर्चित बनेकी ग्रेटा जलवायु परिवर्तनका विषयमा हुने विश्वका सबैजसो कार्यक्रममा वक्ताका रूपमा देखिन थालेकी थिइन् । २०१९ को मार्चमा नोबेल शान्ति पुरस्कारका लागि मनोनयनमा परेपछि भने उनको लोकप्रियता झन् चुलियो । अर्को वर्ष टाइम म्यागेजिनले उनलाई ‘विश्वकै प्रभावशाली व्यक्ति’ को सूचीमा राख्यो । टाइमले अर्को पुस्ताकी ‘रोलमोडल नेता’ भन्दै कभर स्टोरीसमेत प्रकाशित गरेको थियो । विश्वभरका स्कुले विद्यार्थीलाई लक्षित गरी पृथ्वी र भावी पुस्ताको सुनिश्चित भविष्यका लागि उनले सुरु गरेको अभियान जलवायुजन्य जोखिम र असर न्यूनीकरणका लागि क्रियाशील छ । हाल उनको अभियानमा १६९ मुलुकका ४० लाखभन्दा बढी अभियानकर्मीहरू जोडिएका जनाइएको छ । स्वीडेनको स्टकहोममा सन् २००३ को जनवरी ३ मा जन्मिएकी हुन् ग्रेटा । उनको पूरा नाम ग्रेटा टिनटिन एलिबोनोरा एमान थनवर्ग हो ।