कोरोनाबाट पाठ सिकेर अर्को महामारीका लागि विश्‍व तयार हुनुपर्छ : डब्लूएचओ - विश्व - कान्तिपुर समाचार

कोरोनाबाट पाठ सिकेर अर्को महामारीका लागि विश्‍व तयार हुनुपर्छ : डब्लूएचओ 

'स्वास्थ्य विलासिताको बस्तु होइन'
कान्तिपुर संवाददाता

काठमाडौँ — विश्व स्वास्थ्य संगठन (डब्लूएचओ)का महानिर्देशक डाक्टर टेड्रोस एड्हानोम गेहब्रेयससले कोरोना महामारीबाट पाठ सिकेर अर्को महामारीका लागि तयारी अवस्थामा रहनुपर्ने बताएका छन् ।

डब्लूएचओका महानिर्देशक डाक्टर टेड्रोस एड्हानोम गेहब्रेयसस तस्बिर : रोयटर्स

सोमबार डब्लूएचओको मुख्यालय जेनेभामा भएको भर्चुअल मिडिया ब्रिफिङका क्रममा महानिर्देशक डाक्टर टेड्रोसले अब विश्वका सबै देशले जनस्वास्थ्य क्षेत्रमा लगानी गर्नुपर्ने बताएका हुन् ।

कोरोनाले सबैलाई पाठ सिकाएको उल्लेख गर्दै टेड्रोसले भने, 'कोरोनाले सिकाएको एउटा कुरा के हो भने स्वास्थ्य भनेको विलासिताको बस्तु होइन । यो आवश्यकताको कुरा हो र यो एउटा मानव अधिकार हो ।'

महानिर्देशक डाक्टर टेड्रोसले जनस्वास्थ्य सामाजिक, आर्थिक र राजनीतिक स्थायित्वको आधार स्तम्भ भएको बताए ।

उनले कोरोना नै अन्तिम महामारी नहुने उल्लेख गर्दै भविष्यका लागि विश्व तयार रहनुपर्ने पनि बताए । 'यो नै अन्तिम महामारी हुँदैन, इतिहासले बताउँछ कि महामारी हाम्रो जीवनको वास्तविकता हो । अर्को महामारीका लागि पहिलेभन्दा बढी तयार हुनुपर्छ,' उनले भने । उनले केही देशले सार्स, मर्स, पोलियो, इबोला र फ्लुलगायतका महामारीबाट सिकेर तुलनात्मक रुपमा राम्रो काम गरेको बताए । केही देशले मेडिसिनका क्षेत्रमा उल्लेख्य उपलब्धि हासिल गरेको बताउँदै महानिर्देशक टेड्रोसले धेरै देशले भने आधारभूत जनस्वास्थ्यका क्षेत्रमा पनि हेलचेक्य्राइँ गरेको बताए ।

उनले कोरोना नियन्त्रण तथा रोकथाममा कम्बोडिया, जापान, न्युजिल्यान्ड, दक्षिण कोरिया, रुवान्डा, सेनेगल, स्पेन, भियतनामलगायतका देशले प्रभावकारी कदम चालेको बताए । महामारी नियन्त्रणका विषयमा जर्मनीबाट पनि धेरै कुरा सिक्न सकिने उनले बताए । 'जर्मन चान्सलर एन्जेला मर्केलले सन् २०२६ सम्ममा जर्मनीको जनस्वास्थ्यमा ४ अर्ब युरो लगानी गर्ने कुरालाई म स्वागत गर्छु', उनले भने, 'म सबै देशलाई जर्मनीको उदाहरण हेर्दै जनस्वास्थ्य र प्राथमिक स्वास्थ्य उपचारमा लगानी गर्न आग्रह गर्दछु ।'

गत वर्षको डिसेम्बरमा चीनको वुहानबाट सुरु भएको भनिएको कोरोना महामारी विश्वका एकाध देशबाहेक सबैतिर फैलिएको छ । मंगलबार बिहानसम्म विश्वभर कोरोना भाइरसबाट संक्रमित हुनेको संख्या २ करोड ७३ लाख नाघेको छ । त्यस्तै कोरोनाबाट ८ लाख ९२ हजारभन्दा बढीको मृत्यु भएको छ भने कोरोना पुष्टि भएकामध्ये करिब एक करोड ८३ लाख जना संक्रमणमुक्त भएका छन् ।

कोरोना महामारीबाट सबैभन्दा बढी प्रभावित अमेरिकामा मंगलबार बिहानसम्म ६३ लाखभन्दा बढी व्यक्ति संक्रमित भएका छन् । अमेरिकामा कोरोनाबाट एक लाख ८९ हजारभन्दा बढीको मृत्यु भएको छ भने २३ लाख ३३ हजारभन्दा बढी संक्रमणमुक्त भएका छन् ।

त्यस्तै दोस्रो प्रभावित मुलुक भारतमा अहिलेसम्म ४२ लाख ८० हजारभन्दा बढी व्यक्ति कोरोना भाइरसबाट संक्रमित भएका छन् । त्यस्तै भारतमा कोरोनाबाट मृत्यु हुनेको संख्या ७२ हजारभन्दा बढी रहेको छ । संक्रमण पुष्टि भएकामध्ये भारतमा करिब ३३ लाख २३ हजारभन्दा बढी निको भएका छन् ।

प्रकाशित : भाद्र २३, २०७७ १३:५२
प्रतिक्रिया
पठाउनुहोस्

गिरीको मृत्यु घटनामा छानबिन माग गर्दै धर्ना

नवीन पौडेल

परासी — नेपाली कांग्रेस पश्चिम नवलपरासीका उपसभापति सुवास गिरीको मृत्यु प्रकरणबारे छानबिन माग गर्दै विभिन्न दलका नेता–कार्यकर्ताले जिल्ला प्रशासनमा धर्ना दिएका छन् ।

३८ वर्षीय गिरीको साउन २३ गते भैरहवास्थित युनिभर्सल कलेज अफ मेडिकल साइन्सेजमा पित्तथैलीको अपरेसन गरिएको थियो । अपरेसनपछि कोरोना संक्रमण देखिएको भन्दै उनलाई भीम अस्पताल, रूपन्देही र त्यसपछि पाटन अस्पताल, काठमाडौं रिफर गरिएको थियो ।

उपचारकै क्रममा भदौ १ गते पाटन अस्पतालमा उनको मृत्यु भएको थियो । कोरोना परीक्षण नगरी अप्रेसन गर्नु र अप्रेसनपछि कोरोना देखिएको भन्दै रिफर गर्नुमा युनिभर्सल कलेज अफ मेडिकल साइन्सेजको लापरबाही रहेको कांग्रेस नेता तथा प्रदेश सांसद वैजनाथ जयसवालले बताए ।

निष्पक्ष छानबिनका लागि नेकपा, नेपाली कांग्रेस, राष्ट्रिय जनता पार्टी, समाजवादी पार्टी, राष्ट्रिय प्रजातन्त्र पार्टी, स्वतन्त्र राजनीतिक समूह, नागरिक समाज, किसान हकहित संरक्षण मञ्चका नेता–कार्यकर्ताले बिहान ११ देखि १२ बजेसम्म प्रशासनको मूल गेटमा धर्ना दिएका हुन् ।

प्रजिअ सागरमणि पाठकलाई ज्ञापनपत्रसमेत बुझाएका गिरीका आफन्त र नेताहरूले अपरेसनका क्रममा चिकित्सकले गरेको लापरबाही ढाकछोप गर्न कोरोना संक्रमणको कारण देखाइएको भन्दै छानबिन गर्न माग गरेका छन् ।

परिवारले पनि सामान्य अवस्थामा अपरेसन गर्न पुगेका गिरीको अस्पतालको लापरबाहीले मृत्यु भएको भन्दै कारबाहीको माग राखी जिल्ला प्रशासनमा निवेदन दिएको छ।

प्रकाशित : भाद्र २३, २०७७ १३:४४
पूरा पढ्नुहोस्
प्रतिक्रिया
पठाउनुहोस्
×