चीन-दक्षिण एसिया साहित्यिक गतिविधि सुरू- विश्व - कान्तिपुर समाचार

चीन-दक्षिण एसिया साहित्यिक गतिविधि सुरू

लक्ष्मी लम्साल

बेइजिङ — नवौं चीन-दक्षिण एसिया अन्तर्राष्ट्रिय सांस्कृतिक मञ्चअन्तर्गत साहित्यिक गतिविधि सुरू गरिएको छ । विविध सौन्दर्य विषयक चिनियाँ र दक्षिण एसियाली युवाहरूको साहित्यिक वाचनको पहिलो श्रृंखला सोमबारदेखि सुरू भएको हो ।

कोभिड-१९ का कारण अनलाइनबाट गरिएको यस गतिविधिको पहिलो चरणमा चीन, भारत र बंगलादेशका युवाहरूले भाग लिएका छन् भने क्रमशः नेपाल, श्रीलंका, पाकिस्तान लगायत दक्षिण एसियाली युवाहरूले यो गतिविधिमा भाग लिने कार्यक्रम छ ।

सुरूवाती कार्यक्रममा भारतको विश्वभारती विश्वविद्यालय र बंगलादेशको ढाका विश्वविद्यालयका विद्यार्थीहरूले प्रसिद्ध चिनियाँ स्रष्टा लु शुन, पा चिन्, हाइ ची लगायत लेखकका रचनाहरू वाचन गरेका छन् भने चिनियाँ युवाहरूले भारतीय कवि रवीन्द्रनाथ टैगोर, बंगाली कवि लालन फकीरका कविता तथा साहित्यिक सिर्जना वाचन गरेका छन्।

आयोजककातर्फबाट वैदेशिक मित्रताका लागि चिनियाँ जनमैत्री संघका अध्यक्ष लिन सोङ्थ्येनले चीन र दक्षिण एसियाबीच साँस्कृतिक ‘जीन’,प्राचीन इतिहास र विकासको लक्ष्य समान रहेको बताए । २१औं शताब्दी एसियाली शताब्दी भएको बताउँदै उनले प्राचीन रेशमी मार्गको प्रचार प्रसार गर्दै प्राचीन सभ्यता आदानप्रदानमा युवाहरूले योगदान गर्ने अपेक्षा गरे।

चिनियाँ तथा दक्षिण एसियाली युवाहरूले वेभ-भिडियोद्वारा क्लासिक कविता वाचनको तरिकाबाट अन्तरदेशीय मित्रता बढाउनुका साथै जारी कोभिड-१९ महामारी परास्त गर्न आपसी हातेमालो र आत्मविश्वासलाई प्रवर्द्धन गरेका छन् ।

वैदेशिक मित्रताका लागि चिनियाँ जनमैत्री संघ र युन्नान प्रान्त सरकारले आयोजना गरेको नवौं चीन-दक्षिण एशिया अन्तर्राष्ट्रिय सांस्कृतिक मञ्च अन्तर्गत गत मध्य अगस्टदेखि डिसेम्बरसम्मका लागि फोटो प्रदर्शनी चलिरहेको छ ।

नेपालका तर्फबाट वर्ल्ड कल्चरनेटको संयोजनमा आधा दर्जन फोटोग्राफरले नेपालको परम्परा तथा अमूर्त संस्कृति झल्किने फोटोहरू सहित प्रदर्शनीमा भाग लिइरहेका छन् ।

प्रकाशित : भाद्र १५, २०७७ १७:४६
प्रतिक्रिया
पठाउनुहोस्

प्रदेश ५ मा हालसम्म ४ हजार ९ सय १५ जना कोरोनामुक्त

सोमबार ७५ संक्रमित थपिँदा ५१ जना डिस्चार्ज
अमृता अनमोल

बुटवल — प्रदेश ५ मा अहिलेसम्म ४ हजार ९ सय १५ जनाले कोरोना संक्रमणलाई जितेका छन् । पछिल्लो २४ घण्टामा मात्रै ५१ जना व्यक्ति कोरोनामुक्त भएका छन् । उनीहरु विभिन्न अस्पताल र आइसोलेसन केन्द्रबाट उपचार गरी निको भएको सामाजिक विकास मन्त्रालयका सूचना अधिकारी डा. पुष्पराज पौडेलले बताए ।

प्रतिशतका आधारमा कोरोना संक्रमणबाट निको हुनेको दर ७७ प्रतिशत हुन आउँछ । देशभरमा भने निको हुने दर जम्मा ५४ प्रतिशत रहेको छ ।

प्रदेशमा सोमबारसम्म ६ हजार ४ सय १९ जनामा कोरोना संक्रमण भएको सामाजिक विकास मन्त्रालयको तथ्यांक छ । संक्रमणबाट २९ जनाको मृत्यु भएको छ । सोमबार थप ७५ जनामा संक्रमण देखिएको छ । सामाजिक विकास मन्त्रालयको तथ्यांक अनुसार सोमबार सबैभन्दा धेरै बाँकेमा ४० र रुपन्देहीमा ३० जना संक्रमित थपिएका छन् । पाल्पा र नवलपरासी पश्चिममा २/२ जना र कपिलवस्तुमा एक जनामा संक्रमण पुष्टि भएको छ । संक्रमित हुनेमध्ये १४ महिला र ६१पुरुष छन् ।

प्रकाशित : भाद्र १५, २०७७ १७:४४
पूरा पढ्नुहोस्
प्रतिक्रिया
पठाउनुहोस्
×