लन्डन — विश्वभर फैलिरहेको कोरोना भाइरस(कोभिड–१९) संक्रमण बेलायत मा पनि बढ्दै गएपछि सरकारले सम्भावित महामारीबाट बच्‍नका लागि तयारी तीव्र पारेको छ । सरकारले थप सतर्क रहन जनमानसमा अपिल गर्दै एउटा प्रमुख जनस्वास्थ्य अभियान सुरु गरिएको छ । उक्त अभियानमा सर्वसाधारणलाई कम्तीमा २० सेकेन्ड निरन्तर मिचेर हात धुन अपिल गरिएको छ । 

स्वास्थ्यमन्त्री म्याट ह्यानककले संक्रमणबाट बच्न नियमित हात धुनु महत्वपूर्ण हुने बताए । स्वास्थ्यमन्त्री ह्यानककले कोरोनाको रोकथामबारे छलफल गर्न बुधबार लन्डनमा आपत्‌कालीन बैठक बोलाएका थिए ।

पब्लिक हेल्थ इंग्ल्याण्डले साबुन र पानी नभए कम्तीमा ६० प्रतिशत अल्कोहल रहेको ह्याण्ड स्यानिटाइजर प्रयोग गर्न सुझाएको छ । सार्वजनिक यातायात चढेपछि हात धुन विशेष महत्वपूर्ण हुने भएकाले यसमा चनाखो रहन पब्लिक हेल्थले अपिल गरेको छ । 

बिहीबार बिहानसम्म बेलायतमा संक्रमितको संख्या ८७ पुगेको छ । बीबीसीका अनुसार, ८० जना इंग्ल्याण्ड, ३ जना स्कटल्याण्ड, एकजना वेल्स् र ३ जना उत्तरी आयरल्याण्डमा संक्रमित भएका हुन् । तर, इंग्ल्याण्डमा ३ जनामा कसरी कोरोना भाइरस संक्रमण भयो स्पष्ट भएको छैन ।

यूके चिफ मेडिकल अड्भाइजर प्रोफेसर क्रिस ह्वीटीले संक्रमितमध्ये ३६ जना अति प्रभावित देशहरुको हालै भ्रमण गरी फर्किएका वा अरुबाट संक्रमण भएको हुन सक्ने बताए ।

प्रधानमन्त्री बोरिस जोनसनले आपतकालीन कानुन लागू गरेका छन् । जसअनुसार कामदारहरुलाई बिरामी भएको चौथो दिनपछि मात्र तलब दिनुपर्ने कानुनी प्रावधान रहेकामा अब पहिलो दिनदेखि नै तलब दिनु पर्नेछ । यसको अर्थ बिरामी भएका कामदारलाई रोजगारदाताले हप्तामा ४० पाउन्ड थप दिनु पर्नेछ ।