नयाँ चिनियाँ भाइरस फैलनसक्ने भन्दै विश्वभरका अस्पताललाई सजग रहन डब्लूएचओको आग्रह- विश्व - कान्तिपुर समाचार

नयाँ चिनियाँ भाइरस फैलनसक्ने भन्दै विश्वभरका अस्पताललाई सजग रहन डब्लूएचओको आग्रह

रोयटर्स

जेनेभा — विश्व स्वास्थ्य संगठनले चीनको वुहान सहरमा देखिएको नयाँ प्रकारको कोरोनाभाइरस त्यहाँ महामारीको रुपमा फैलिएको हुनसक्ने आशंका गरेको छ । कोरोनाभाइरस यस्तो प्रकारको भाइरस हो जसले सामान्य रुघाखोकीदेखि सार्स जस्तो जटिल संक्रमण हुनसक्दछ ।

थाइल्याण्डमा नयाँ प्रकारको स्ट्रेनसहितको कोरोनाभाइरस भेटिएपछि एक चिनियाँ महिलालाई त्यहाँका अधिकारीहरुले क्वारेन्टाइनमा राखेर उपचार गरिरहेका छन् । थाइ अधिकारीका अनुसार चीनभन्दा बाहिर यसप्रकारको भाइरस भेटिएको यो पहिलो घटना हो ।


चीनको केन्द्रमा रहेको वुहान सहरमा ४१ जना निमोनिया भएका बिरामीको जाँच गर्दा सबैमा नयाँ प्रकारको कोरोनाभाइरस रहेको पत्ता लागेको थियो । जसमध्ये एकजनाको मृत्यु समेत भएको छ । त्यसपछि त्यहाँ कुनै नयाँ बिरामी नभेटिएको वुहानका स्वास्थ्य अधिकारीहरुले दाबी गरेका छन् ।


'हामीसँग भएको सूचना अनुसार हाल यो मान्छे–मान्छेमा मात्रै सरेको देखिएको छ, त्यो पनि आफ्नै परिवार भित्र । र, यो अन्यत्र फैलिएको छैन भन्ने देखिन्छ,' विश्व स्वास्थ्य संगठनको नयाँ रोग विभागकी कायममुकायम प्रमुख मारिया भान केखोभले भनिन् ।


यद्यपी विश्व स्वास्थ्य संगठनले भने यो अझै ठूलो संख्यामा फैलिएको हुनसक्ने आशंका जेनेभामा मंगलबार भएको प्रेस ब्रिफिङमा बताएको थियो । 'अहिले सुरुवाती अवस्था रहेकोले केही ठोकुवा गर्न मिल्ने स्थिति छैन,' ब्रिफिङमा भनिएको थियो ।


विश्व स्वास्थ्य संगठनले संसारभरका अस्पतालहरुलाई उक्त संक्रमणका बारे जानकारी दिँदै भाइरस देखिएमा त्यसलाई फैलन नदिने उपाय अपनाउन आग्रह गरेको छ । यो नयाँ भाइरसका लागि कुनै यकिन उपचार नभएपनि एन्टीभाइरल औषधिहरुले नै काम गर्नसक्ने अनुमान गरिएको छ ।


चिनियाँ नयाँ वर्ष नजिकिँदै गर्दा सो समयमा घुम्न निस्कने चिनियाँ पर्यटकहरुबाट रोग फैलनसक्ने आशंका विश्व स्वास्थ्य संगठनले गर्दै विशेष गरेर थाइल्याण्डका अधिकारीहरुलाई उच्च सतर्कता अप्नाउन सुझाएको छ । हालै वुहान भ्रमण गरेका जो कोहीलाई पनि रुघाखोकी र ज्वरो आए तत्काल स्वास्थ्यकर्मीलाई देखाउन पनि आग्रह गरिएको छ ।

प्रकाशित : माघ १, २०७६ १७:१७
प्रतिक्रिया
पठाउनुहोस्

रूरू क्षेत्रमा मकर स्नान गर्नेको घुँइचो (तस्बिरहरु)

माधव अर्याल

पाल्पा — पाल्पा, गुल्मी र स्याङ्जाको संगमस्थल रिडी रूरू क्षेत्रमा बुधबारदेखि मकर स्नान मेला सुरू भएको छ । माघे सङ्क्रान्तिका अवसर पारेर बुधबारबाट मेला सुरु भएको हो ।  

रूरू क्षेत्रमा कालीगण्डकीमा नुहाएर अर्गली क्षेत्रमा रहेको ऋषिकेशव मन्दिरमा दर्शन गर्दा पुण्य प्राप्त गरिने विश्वासले बिहानैदेखि स्नान गर्ने भक्तजनहरूको घुॅइचो लागेको छ । स्नान गर्ने मेला तीन दिनसम्म रहन्छ । नेपालको चार धाममध्यको एक रूरू क्षेत्र नेपालसहित भारतबाट आएका श्रद्धालु भक्तजनहरूको चहलपहलले रमाइलो भएको स्थानीय सम्झना भट्टराईले बताइन् ।


स्नान क्षेत्रमा विभिन्न स्थानबाट आएका व्यापारीले उखुबाट बनाइएको गुँड, खुदो, चाकु र स्थानीय उत्पादनका स्टल राखेका छन् । गुल्मीतर्फ स्थानीय क्लब र गुल्मी उद्योग वाणिज्य संघ रिडी शाखाले रूरू महोत्सव राखेको छ । साथै खानपीन, व्यापार र सांस्कृतिक कार्यक्रम राखिएको छ ।

सोह्रौ शताव्दीका राजा मणिमुकुन्द सेनले कालीगण्डकीमा स्नान गर्दा भगवान ऋषिकेशवको मुर्ति फेला परेपछि मुर्तिलाई प्रतिस्थापन गरको भन्ने किवंदन्ती छ । ऋषिकेशव मन्दिर र यस क्षेत्रलाई रूरू कन्याको जन्मस्थल भनिन्छ । मणिमुकुन्द सेनवाट ऋषिकेशवको मूर्ति प्राप्त गरी स्थापना गरेको प्रसिद्ध ऋषिकेशव मन्दिरले धार्मिक पर्यटकको लागि आर्कषण बन्न सक्ने स्थानीयहरु बताउँछन् ।


सक्रान्तिको अवसरमा व्यापार गर्न पाल्पा, बाग्लुङ्ग, रूकुम, रोल्पा, हुम्ला, जुम्ला, मुस्ताङलगायत स्थानबाट घरेलु सामग्री बिक्रीको लागि रिडीमा आएका छन् ।


मेलामा रोल्पा, रूकुम सल्यान, प्यूठान, पर्वत, बाग्लुङ, म्याग्दी, मुस्ताङलगायतका जिल्लाका व्यापारीहरू जाडो छल्न र त्यस क्षेत्रमा पाइने ऊनीजन्य बस्तुहरू जस्तै, राडीपाखी, कम्बल, बाँसको सामग्रीहरू, जडीबुटीहरू खरिद बिक्री आउने ऋषिकेशव मन्दिर व्यवस्थापन समितिका पुजारी चुरामणी तिमिल्सेनाले बताए ।

प्रकाशित : माघ १, २०७६ १७:०९
पूरा पढ्नुहोस्
प्रतिक्रिया
पठाउनुहोस्
x
×