साउदी राजकुमारले पत्रकार जमाल खसोग्गी हत्याको नैतिक जिम्मवारी लिए - विश्व - कान्तिपुर समाचार

साउदी राजकुमारले पत्रकार जमाल खसोग्गी हत्याको नैतिक जिम्मवारी लिए 

एजेन्सी

काठमाडौँ — साउदी राजकुमार महोम्मद बिन सलमानले पत्रकार जमाल खसोग्गीको हत्याको नैतिक जिम्मेवारी लिने बताएका छन् । पीबीएस डकुमेन्ट्रीले अर्को साता प्रशारण गर्न लागेको अन्तर्वातामा राजकुमार सलमानले उक्त घटना आफ्नो शासनकालमा भएको उल्लेख गर्दै घटनाको नैतिक जिम्मेवारी लिने बताएका हुन्।

पत्रकार खसोग्गीको हत्या प्रकरणमा साउदी राजकुमार सलमानले यसअघि सार्वजनिक रुपमा यो विषयमा कुनै प्रतिक्रिया दिएका थिएनन् ।


अमेरिकी गुप्तचर संस्था सीआईए र पश्चिमेली मुलुकहरुले सलमानकै निर्देशनमा पत्रकार खसोग्गीको हत्या गरिएको दाबी गर्दै आएका थिए । साउदी अधिकारीहरुले उक्त घटनामा राजकुमारको कुनै संलग्नता नरहेको बताउँदै आएका थिए ।


पीबीएसका मार्टिन स्मिथलाई दिएको अन्तर्वातामा राजकुमार सलमानले भनेका छन्, 'यो घटना मेरो शासनकालमा भएको छ । र, यसको नैतिक जिम्मेवारी म आफैँ लिन्छु ।' अन्तवार्ता अक्टोबर १ मा प्रशारण हुँदैछ ।


अमेरिकामा रहँदै आएका वासिङटन पोस्टका स्तम्भकार खसोग्गी सन् २०१८ को अक्टोबर २ मा इस्तानबुलस्थित साउदी कन्सुलेटमा पसेको केही बेरमै मारिएका थिए ।


घटनामा संलग्न भएको भन्दै अमेरिकाले साउदी अरबका १७ जनामाथि प्रतिबन्ध लगाएको थियो भने टर्कीले खसोग्गीको हत्या प्रकरणमा राजकुमार मोहम्मद विन सलमानका निकट साउद अल–कहतानी र अहमद असिरीविरुद्ध वारेन्ट जारी गर्न साउदी अरबसँग माग गरेको थियो।


साउदीले घटनामा संलग्न भएको भन्दै कहतानी र असिरीलाई बर्खास्त गरेको थियो भने १८ जना पक्राउ गरेको थियो ।


उक्त घटनामा टर्कीका राष्ट्रपति रेसेप तैयप एड्रोगानले साउदी अरबकै उच्च तहको संलग्नतामा भएको बताउँदै आएका छन् । यस्तै अमेरिकी राष्ट्रपति डोनाल्ड ट्रम्पले साउदी पत्रकार जमाल खसोग्गी हत्याबारे गुप्तचर संस्था सीआईएको रिपोर्ट ‘निकै अपरिपक्व’ भएको प्रतिक्रिया दिएका थिए ।


यो पनि पढ्नुहोस्ः

खसोग्गी हत्या : साउदी अरबविरुद्ध अमेरिकाले कडा कदम नचाल्ने

प्रकाशित : आश्विन ९, २०७६ १६:२६
प्रतिक्रिया
पठाउनुहोस्

समीक्षा बैठकमा प्रधानमन्त्रीले भने - 'हामी चल्ते चलाते ढंगले होइन, नवीनता र सहजताका साथ अगाडि बढ्नुपर्छ'

रासस

काठमाडौँ — प्रधानमन्त्री केपी शर्मा ओली देखिने प्रकारको आर्थिक उन्नति र विकासको प्रगति ल्याउन सबै मन्त्री र सचिवहरुलाई समन्वयात्मक रुपमा सक्रिय हुन निर्देशन दिएका छन् । चालू आर्थिक वर्षको नेपाल सरकारको नीति तथा कार्यक्रम र बजेटको पहिलो दुई महीनाको समीक्षाका लागि प्रधानमन्त्री तथा मन्त्रिपरिषद् कार्यालय, सिंहदरबारमा आयोजित बैठकमा प्रधानमन्त्री ओलीले घोषित लक्ष्य र प्रगतिलाई आगामी समीक्षामा नयाँ सोचका साथ बढी स्पष्ट र मूर्त बनाएर प्रस्तुत गर्न पनि निर्देशन दिए ।

प्रधानमन्त्री ओलीले भने, 'अगाडि नबढेका आयोजना के कारण अगाडि नबढेको हो भन्ने देखिनुपर्छ । यस दुई महिनामा नभएका काम छन् भने आगामी दुई महिनामा दोब्बररुपमा काम गर्नुपर्छ । त्यसो हुन नसकेकामा वार्षिक लक्ष्य पूरा हुन नसक्ने स्थिति हुन्छ । यसमा साथीहरुको ध्यान जाओस् । काम बढी गर्न र प्रतिवेदन चुस्त, दुरुस्त राख्नुहोस् ।'

उनले महत्वपूर्ण र ठूला काम हुन नसकेमा सानासाना काम सम्पन्न हुनाको अर्थ हुँदैन भन्दै विकासमा योगदान दिन, आर्थिक उन्नति र समाजमा परिवर्तनको सकारात्मक परिणाम र असर पार्न सक्ने गरी महत्वपूर्ण कार्यक्रममा केन्द्रित हुन पनि आग्रह गरे । बैठकमा एक मन्त्रालयका फाइल अर्को मन्त्रालयमा रोकिएर पनि प्रगति हुन नसकेको कुरा उठेपछि प्रधानमन्त्री ओलीले त्यसो नगर्न आग्रह गर्दै फाइल बढी अल्झिने मानिएका मन्त्रालयलाई ढिलाइ नगर्न र अर्को मन्त्रालयको प्रगतिमा सघाउन आग्रह गरे । उनले सही समयमा सही काम गर्न र मन्त्रिपरिषद्बाट फिर्ता हुने खालका प्रस्ताव नल्याउन पनि ध्यानाकर्षण गरे । उनले भने, 'हामी चल्ते चलाते ढंगले होइन, नवीनता र सहजताका साथ अगाडि जान चाहन्छौँ । जटिलता होइन । सहजता खोज्नुपर्छ ।'

उनले भने विकास किन भएन, किन ढिलो हुन्छ भन्ने कारण खोज्नुपर्छ भन्दै खरीद ऐन वा अरु कारणहरु के छन्, एउटै ठेकेदारले क्षमताभन्दा बढी ठेक्का किन लिन्छ भन्ने प्रश्नको उत्तर खोज्नुपर्ने उल्लेख गरे ।
राजनीतिक प्रभावमा केही ठेकेदारलाई काखी च्यापेर, उनीहरुले जे गरे पनि आँखा चिम्लिएर जाने प्रवृत्ति रोकिनुपर्ने र देशलाई ध्यानमा राखेर स्वच्छता, पारदर्शिता र समुचित ढंगले विकासलाई अगाडि बढाएर जनतामा सन्तुष्टि दिन आग्रह गरे । बैठकमा प्रधानमन्त्री तथा मन्त्रिपरिषद्को कार्यालयले बजेट, कार्यक्रम र सम्बन्धित मन्त्रीसँगको कार्यसम्पादन सम्झौतानुसार प्राप्त प्रगति विवरण प्रस्तुत गरेको थियो ।

प्रकाशित : आश्विन ९, २०७६ १५:५५
पूरा पढ्नुहोस्
प्रतिक्रिया
पठाउनुहोस्
×