खसोग्गी हत्या प्रकरण : ‘सीआइए रिपोर्ट अपरिपक्व’- विश्व - कान्तिपुर समाचार
कान्तिपुर वेबसाईट
AdvertisementAdvertisement

खसोग्गी हत्या प्रकरण : ‘सीआइए रिपोर्ट अपरिपक्व’

एएफपी

वासिङटन/क्यालिफोर्निया — अमेरिकी राष्ट्रपति डोनाल्ड ट्रम्पले साउदी पत्रकार जमाल खसोग्गी हत्याबारे गुप्तचर संस्था सीआईएको रिपोर्ट ‘निकै अपरिपक्व’ भएको प्रतिक्रिया दिएका छन् ।

पत्रकार जमाल खसोग्गीको टर्कीस्थित साउदी कन्सुलेट कार्यालयमा गरिएको हत्याको विरोधमा बेलायतको लन्डनस्थित साउदी दूतावासअगाडि गरिएको विरोध प्रदर्शन । तस्बिर : रोयटर्स

अमेरिकी गुप्तचर संस्था सीआईएले शनिबार खसोग्गी हत्या साउदी युवराज मोहम्मद बिन सलमानको निर्देशन बमोजिम भएको उल्लेख गरेको थियो । ट्रम्पले उक्त घटनाबारे मंगलबारसम्म पूर्ण रिपोर्ट सार्वजनिक भइसक्ने जनाए ।


आगलागीले ध्वस्त क्यालिफोर्निया राज्यको प्याराडाइज सहरको भ्रमणका क्रममा ट्रम्पले अमेरिकी सरकारले मंगलबार खसोग्गी हत्यामा को संलग्न छ भन्ने प्रस्ट पार्ने दाबी गरे । यद्यपि उनले सीआईए रिपोर्टअनुसार हत्यामा ‘सलमान जिम्मेवार रहेको पनि हुनसक्ने’ जनाए ।


यसअघि अमेरिकी विदेश मन्त्रालयले खसोग्गी हत्याबारे निष्कर्षमा पुग्ने कार्य गरिरहेको जनाएको थियो । मन्त्रलायका प्रवक्ता हिथर नुएर्टद्वारा जारी विज्ञप्तिमा उल्लेख छ, ‘खसोग्गी हत्याबारे अझै केही प्रश्न अनुत्तरित छन् ।’


अमेरिकी सञ्चारमाध्यमले शनिबार सीआईएले घटनासँग निकट व्यक्तिहरूले दिएको जानकारीअनुसार आफूहरू घटनामा सलमानको संलग्नता रहेको निक्र्योलमा पुगेको जनाएको समाचार प्रकाशन गरेका थिए । सीआईए अधिकारीले यसबारे थप तथ्यहरूको अध्ययन गरिरहेको समेत जनाइएको थियो ।


अमेरिकी समाचार संस्था वासिङटन पोस्टले सीआईएलाई उद्धृत गर्दै खसोग्गीको हत्या गर्न १५ जना साउदी एजेन्टहरू टर्कीको इस्तानबुलस्थित कन्सुलेट कार्यालय पुगेको जनाएको थियो ।


पोस्टले उक्त रिपोर्ट आंशिक रूपमा मोहम्मद बिन सलमानका भाइ राजकुमार खालिद बिन सलमानले गरेको टेलिफोनमा आधारित भएको जनाएको थियो ।


तर साउदीले सीआईएको दाबी पूर्ण रूपमा गलत रहेको प्रतिक्रिया दिएको छ । उसले ‘खसोग्गी हत्यासम्बन्धी योजनाबारे युवराज सलमानलाई केही थाहा नभएको’ दाबी गरेको छ ।


खसोग्गीको गत अक्टुबर २ मा टर्कीस्थित साउदीको कन्सुलेट कार्यालयमा हत्या गरिएको थियो । हत्यापछि प्रमाण नष्ट गर्न उनको शव एसिडमा घोलिएको टर्कीका अधिकारीको दाबी छ । खसोग्गी युवराज सलमानका कतिपय नीतिका कट्टर आलोचक थिए । टर्कीका राष्ट्रपति रेसेप तैयप इर्दोगानले उनको हत्यामा साउदी अरबको उच्च तहको संलग्नता रहेको दाबी गर्दै आएका छन् ।

प्रकाशित : मंसिर २, २०७५ २१:२२
प्रतिक्रिया
पठाउनुहोस्

१ लाखको खुकुरी

रासस

बागलुङ — हेर्दै अजंगको, तौल ३५ किलो र मूल्य पनि रु. ९९ हजार ९ सय ९९ तोकिएको खुकुरी हेर्नेको भीड बिक्री कक्षमा छ । कालिगड मनबहादुर विकलाई खुकुरीबारे जानकारी दिँदैमा फुर्सद छैन ।

अहिले बडिगाड महोत्सव छिर्नेहरूको ध्यान खुकुरीले खिचेको छ ।

स्थानीय सीपबाट बनेको खुकुरी महोत्सवको आकर्षण बनेको हो । उक्त खुकुरी बनाउन आठ दिन लागेको कालिगड विकले बताए ।

३८ वर्षीय विकले १३ वर्षको उमेरदखि उक्त पेशा अपनाउँदै आएका छन् । उनले महोत्सवमा खुकुरीसँगै अन्य घरेलु हातहतियार भाँडाकुडा बिक्रीमा राखेका छन् ।

विगत सात वर्षदेखि बुर्तिवाङ बजारमा 'बुर्तिवाङ आरन सेवा' सञ्चालन गर्दै आएका विकले भने,'मेला तथा महोत्सव हुँदा ‘स्टल’ राख्छु । एउटा महोत्सवमा जाँदा करिब एक लाखसम्म कमाइ हुन्छ ।' छिमेकी जिल्ला गुल्मी, पाल्पा लगायत स्थानमा हुने मेला, महोत्सवमा पनि उनी स्टल लिन्छन् ।

आगन्तुकलाई लोभ्याउने गरी बनाएको खुकुरी किन्ने भन्दा पनि हेर्ने बढी हुन्छन् । सोख र पैसा भएकाले सजावाटका लागि ठूलो खुकुरी किन्ने गर्छन् । 'ठूलो र महंगो खुकुरीको विशेष माग हुँदा मात्र बनाएर बेच्छौँ' कालिगड विकले भने,'महोत्सवमा आउने दर्शकले अनौठो मानेर उक्त खुकुरीबारे जिज्ञासा लिने गरेका छन् ।'

फलामलाई आरानमा गालेर र घनले पिटेर खुकुरीको रुप दिन कडा मेहनत लागेको उनको भनाइ थियो । विकलाई व्यवसायमा उनकी श्रीमती सरिताले पनि साथ दिँदै आएकी छन् । मेला–महोत्सवमा आफ्नो उत्पादन लिएर जाँदा विक दम्पतिसँगै जान्छन् । विकको व्यवसायमा अन्य छ कालिगडले रोजगारी पाएका छन् ।

सबै खर्च कटाएर मासिक एक लाख आम्दानी हुने गरेको विक बताउँछन् । 'आरन हाम्रो पुर्ख्यौली पेशा हो' विकले भने,'अहिले आरनलाई सुधारेर व्यावसायिक बनाएको छु ।'

बडिगाड गाउँपालिकामा पहिलोपटक आयोजना गरिएको ‘बडिगाड महोत्सव तथा पौँदी न्वागी मेला’मा घरेलु तथा स्थानीय उत्पादनलाई प्राथमिकता दिइएको छ । महोत्सव यही मंसिर ९ गतेसम्म चल्नेछ ।

महोत्सवमा विविध खेलकूद तथा सांस्कृतिक कार्यक्रम राखिएको महोत्सव आयोजक समितिका अध्यक्ष कलाधर घिमिरेले बताए । उक्त महोत्सव शनिबार संस्कृति, पर्यटन तथा नागरिक उड्यनमन्त्री रवीन्द्र अधिकारीले उद्घाटन गरेका थिए ।

प्रकाशित : मंसिर २, २०७५ २०:३०
पूरा पढ्नुहोस्
प्रतिक्रिया
पठाउनुहोस्
×