दार्चुला — व्यास गाउँपालिका–१ छाङरु र टिंकर मतदान केन्द्रमा हेलिकोप्टरमार्फत निर्वाचन सामग्री र कर्मचारी पठाइएको छ । स्थलमार्गबाट जाने अवस्था नभएकाले वैशाख ३० गते हुने स्थानीय तहको निर्वाचनका लागि नेपाली सेनाको हेलिकोप्टरबाट प्रहरीसहित निर्वाचनमा खटिने कर्मचारी र सामग्री पठाइएको हो ।

नेपाली भूमिबाट व्यास जान बाटो नभएका कारण हेलिकोप्टरमार्फत जनशक्ति र सामग्री पठाइएको प्रमुख जिल्ला अधिकारी दीर्घराज उपाध्यायले बताए । उनका अनुसार छाङरु र टिंकर मतदान केन्द्रका लागि मतपत्र, मतदाता परिचयपत्रलगायत निर्वाचन सामग्री तथा मतदान अधिकृतसहित ८ कर्मचारी पठाइएको छ । सीमा प्रहरी चौकी टिंकरमा खटिन ७ जना प्रहरीलाई समेत पठाइएको छ । 

व्यास–१ मा दुई बस्ती छन्, छाङरु र टिंकर । त्यहाँका स्थानीय चिसो छल्न हिउँदमा बेसी (सदरमुकाम) झर्छन् । स्वदेशबाट थातथलो छाङरु र टिंकर पुग्ने बाटो नहुँदा स्थानीय भारतीय प्रशासनको अनुमति लिएर भारतीय बाटो हुँदै गाउँ फर्किसकेका छन् । बेसीबाट सरसामान र चौपायासहित कुञ्चा हिँडेकामध्ये आधाजसो गाउँ पुगिसकेको र केही बाटोमै रहेको स्थानीय दानसिह टिंकरीले बताए । जिल्ला निर्वाचन कार्यालयका अनुसार छाङरुको कैलाशपति आधारभूत विद्यालय मतदान केन्द्रमा ३ सय ७५ र टिंकरको आवि मोती महिला संघ केन्द्रमा २ सय ३१ मतदाता छन् । यसपाली गर्भवती, सुत्केरी, असक्त र वृद्धहरू खलंगामै बसेकाले मत कम खस्ने स्थानीय टिंकरीको आकलन छ । ‘भोट हाल्नैका लागि अब गाउँ जाने अवस्था कमै छ,’ उनले भने ।