कमलबार, अछाम — आसन्न स्थानीय तहको चुनावको चहलपहल अछामका ग्रामीण भेगसम्म पुगेको छ । प्रमुख राजनीतिक दलका नेताहरू यतिबेला ग्रामीण भेगमा मतदाता रिजाउनमा व्यस्त देखिन्छन् । अछाममा मुख्य प्रतिस्पर्धीका रूपमा रहेका कांग्रेस र एमालेले चुनावी अभियानलाई तीव्रता दिएका छन् । माओवादी केन्द्र, नेकपा समाजवादी र विप्लव निकट नेकपा माओवादीका कार्यक्रम पनि देखा पर्न थालेका छन् ।

मतदाता सर्वेक्षण, भेटघाट, टोल कमिटी विस्तारलगायत चुनावी अभियान गाउँसम्मै पुगेका छन् । कांग्रेसले करिब एक महिनादेखि नै केन्द्रको सर्कुलरअनुसार घरघर जाऔं, कांग्रेस जिताऔं अभियान चलाइरहेको छ । एमालेले टोल कमिटी विस्तार र जनवर्गीय संगठनलाई क्रियाशील बनाइरहेको छ । स्थानीय तह जितेर जिल्लामा बलियो देखिएको कांग्रेसलाई प्रतिनिधिसभा र प्रदेशसभाको चुनाव जित्नैपर्ने दबाब छ । एमाले विभाजनको असरले नेकपा समाजवादीमा गएकाहरूलाई एमालेमै फर्काउनुपर्ने र जिल्लामा जितिरहेको प्रदेश र प्रतिनिधिसभालाई जोगाइराख्नुपर्ने चुनौती एमालेलाई छ ।

जिल्लास्तर र केन्द्रका नेताको गाउँमा प्रवेशलाई भने सर्वसाधारणले सकरात्मक रूपमा लिएका छैनन् । आफूलाई भोटको आवश्यकता परेका बेला मात्रै गाउँमा आउने राजनीतिक दलका नेताको प्रवृत्तिले अछामका सर्वसाधारण रुष्ट भएका छन् । कोरोनाको समयमा नेताबाट भएको असहयोग, जनताको योजना प्राथमिकतामा नराखेर पहुँचका आधारमा आएका योजना र गएको निर्वाचनमा पाएका आश्वासन पूरा नभएपछि सर्वसाधारण विरक्तिएका छन् ।