मिलान — अन्तर्राष्ट्रिय खेल पत्रकार महासंघ (एआईपीएस) ले अर्जेन्टिनाका कप्तान लियोनेल मेसीलाई फिफा विश्वकप २०२६ को उत्कृष्ट खेलाडी घोषित गरेको छ । विश्वभरका १२१ देशका ४७२ खेल पत्रकारको सहभागितामा गरेको मतदानका आधारमा मेसीले कुल ११७९ अंक प्राप्त गर्दै फ्रान्सका केलियन एमबाप्पे (७१७ अंक) र इंग्ल्यान्डका जुड बेलिङ्घम (४७० अंक) लाई पछि पारेका थिए ।

एआईपीएसले आयोजना गरेको मतदानमा एआईपीएस कार्डधारी खेल पत्रकार तथा एआईपीएस विश्वकप हटलाइन कार्यक्रममा सहभागी विश्वभरका पत्रकार मतदाता रहेका थिए । उनीहरूले विश्वकपका उत्कृष्ट तीन खेलाडीलाई प्राथमिकताको आधारमा छनोट गरेका थिए ।

मतदान प्रणालीअनुसार पहिलो स्थानका खेलाडीले ५ अंक, दोस्रो स्थानले ३ अंक र तेस्रो स्थानले १ अंक प्राप्त गरेका थिए । जुलाई १३ मा सार्वजनिक गरिएको अन्तिम सूचीमा २० खेलाडी समावेश थिए । विश्वभरका खेल पत्रकारको मतका आधारमा मेसीलाई फिफा विश्वकप २०२६ को एआईपीएस उत्कृष्ट खेलाडी घोषित गरिएको हो ।

३९ वर्षीय मेसी विश्वकपको इतिहासमा ६ संस्करण खेल्ने तीन खेलाडीमध्ये एक बन्दै २०२६ को विश्वकपमा सहभागी भएका थिए । लगातार दोस्रो विश्वकप उपाधिबाट उनी एक जितले मात्र टाढा रहे पनि उनले आफ्नो उमेरलाई चुनौती दिने अद्भुत प्रदर्शनमार्फत विश्व फुटबललाई फेरि एकपटक मोहित बनाए ।

स्पेनसँगको हारपछि उनी भावुक बने । अर्जेन्टिनी समर्थकहरूले उनको नाम गुञ्जाइरहँदा उनी आँसुमा डुबेका थिए । उनले सोमबार इन्स्टाग्राममार्फत भनेका थिए, ‘यो पीडा असाध्यै ठूलो छ । यो घाउ निको हुन समय लाग्नेछ । तर हामीले अन्तिमसम्म दिएको संघर्ष, असम्भव जस्ता खेललाई जितमा बदल्दै सिर्जना गरेका अविस्मरणीय क्षणलाई म सधैं सम्झिरहने छु ।’

२०२६ को विश्वकपमा अर्जेन्टिनी टोलीका प्रशिक्षक लियोनल स्कालोनीको टोलीका लागि मेसी वास्तविक धड्कन बनेका थिए । निर्णायक क्षणहरूमा उनले टोलीलाई नेतृत्व प्रदान गरे । ८ खेलमा ८ गोल र चार असिस्ट गर्दै उनले अर्जेन्टिनालाई फाइनलसम्म पुर्‍याउन महत्वपूर्ण भूमिका खेलेका थिए । अर्जेन्टिनाले प्रतियोगिताभर कठिन अवस्थाबाट खेललाई आफ्नो पक्षमा पार्ने र अतिरिक्त समयमा संघर्ष गरेर जित निकाल्ने कला प्रदर्शन गरेको थियो, जसको केन्द्रमा मेसी नै थिए ।

मेसीले २०२६ को विश्वकपपछि आफ्नो नाममा अनेकौं कीर्तिमान थपे । पुरुष र महिला दुवै विश्वकपलाई समेट्दा उनी विश्वकप इतिहासका दोस्रो सर्वाधिक गोलकर्ता बनेका छन् । विश्वकपमा उनको कुल गोलसंख्या २१ पुगेको छ भने केलियन एम्बाप्पेको २२ गोल पुग्यो ।

विश्वकप इतिहासमा सर्वाधिक १२ असिस्ट गर्ने खेलाडी पनि मेसी नै हुन् । उनको नाममा थुप्रै कीर्तिमान पनि छ । उनी विश्वकपमा सर्वाधिक ३४ खेल खेल्ने, विश्वकपमा सर्वाधिक २३ खेल जित्ने, नकआउट चरणमा सर्वाधिक १७ खेल खेल्ने, लगातार ९ विश्वकप खेलमा गोल गर्ने कीर्तिमान तथा किशोरावस्था २० र ३० को दशकमा विश्वकपमा गोल गर्ने एकमात्र खेलाडी हुन् ।

६ पटकको विश्वकप यात्रामा मेसीले अर्जेन्टिनालाई तीन पटक फाइनलमा पुर्‍याएका छन् । उनले २०२२ मा विश्वकप जितेका थिए । विश्वकपमा एकभन्दा बढी पटक गोल्डेन बल जित्ने उनी एकमात्र खेलाडी हुन् । २०२६ मा उनले सिल्भर बल पुरस्कार पाएका थिए ।