ह्युस्टन — विश्वकप २०२६ को आफ्नो पहिलो खेलमा पोर्चुगलले बलमाथि अत्यधिक नियन्त्रण राख्न सक्यो । तर रोबर्टो मार्टिनेजको टिमले त्यसलाई निर्णायक गोलमा परिणत गर्न भने सकिरहेको थिएन । जतिबेला यही पोर्चुगलले मंगलबार हुने खेलमा उज्वेकिस्तानको सामना गर्नेछ, त्यतिबेला टिमसामु एउटै विकल्प आफ्नो आक्रमणलाई तिखार्ने रहनेछ ।

डीआर कंगोविरुद्धको खेलमा पोर्चुगल १–१ को निराशाजनक बराबरीमा रोकिएको थियो । ओप्टाले उपलब्ध गराएको तथ्यांकअनुसार पोचुर्गलले आफ्नो अफ्रिकी प्रतिद्वन्द्वीविरुद्ध ७ सय ८३ पास खेलेको थियो । बढीभन्दा बढी पास खेल्ने स्पेनले नै ८ सयको हाराहारीमा एउटा खेलमा यस्तो प्रवृत्ति दोहोर्‍याउने गर्छ । अझ पोर्चुगलले खेलमाथि लिएको नियन्त्रणको प्रतिशत थियो, ७५ ।

तर पोर्चुगलले कंगोको पोस्टमा सात प्रहार मात्र गर्न सक्यो र त्यसमध्ये एक प्रहार मात्र गोलमा परिणत भयो । त्यो भनेको छैटौं मिनेटमा जाओ नेभेसको हेडबाट सम्भव गोल हो । विश्व विख्यात खेलाडी क्रिस्टियानो रोनाल्डोसहितको टिमबाट यो भन्दा राम्रो प्रदर्शन अपेक्षित हुने गर्छ ।

त्यतिमात्र होइन, पोर्चुगलसामु आक्रमणको अनेक विकल्प पनि उपलब्ध छन् । तर पोर्चुगलले विपक्षको फाइनल–थर्डमा सिर्जनात्मक अवसर र त्यसको कार्यान्वयन तथा सही समयमा सही निर्णय गर्न सकिरहेको छैन । पहिलो चरणमा पोर्चुगलले रचेको आक्रमण सबैभन्दा कम रहेको छ, सहभागी सबै ४८ देशमध्ये नै । केप भार्डेविरुद्ध गोलरहित बराबरीमा पनि स्पेनले त्यो भन्दा बढी आक्रमण बुनेको थियो, त्यो भनेको २७ ।

समूह ‘के’ मा पोर्चुगलले विश्वकपमै डेब्यु गरिरहेको उज्वेकिस्तानको सामना गर्दा पक्कै पनि बढी आक्रमण र त्यसलाई निर्णायक गर्न सक्ने क्षमता अपेक्षा गरिनेछ । उज्वेकिस्तान कोलम्बियाविरुद्ध आफ्नो पहिलो खेलमा ३–१ ले पराजित रहेको थियो । त्यस खेललाई लिएर उज्वेकिस्तानी प्रशिक्षक फाबियो कानाभारो मान्छन्, उनका खेलाडी बढी नै भावनात्मक भएर खेले ।