काठमाडौँ — दीपेन्द्रसिंह ऐरीले ट्वान्टी–२० विश्वकप क्रिकेटमा लामो समयदेखि नेपाली ब्याटरको ठूलो इनिङ्स खेल्न नसकेको खडेरी त पुरे होलान्, तर यसले नेपालको हार शृंखला रोक्न सकेन । नेपाल आइतबार वानखेडे स्टेडियममा वेस्ट इन्डिजसँग ९ विकेटले पराजित भयो ।

नेपाललाई पराजित गर्दै वेस्ट इन्डिज ट्वान्टी–२० विश्वकप क्रिकेटको ‘सुपर एट’ मा प्रवेश गरेको छ । नेपालले दिएको १ सय ३४ रनको लक्ष्य वेस्ट इन्डिजले १५.२ ओभरमै पूरा गर्‍यो । नेपालको यो लगातार तेस्रो पराजय हो । नेपाल पहिलो दुई खेलमा इंग्ल्यान्डसँग ४ रन र इटालीसँग १० विकेटले पराजित भएको थियो । समूहको ‘सी’ को पुछारमा रहेको नेपालले मंगलबार स्कटल्यान्डसँग खेल्नेछ । 

कुल तीन विश्वकपमा गरी नेपालले खेलेको यो १० औं खेल हो, त्यसमा दुई खेलमात्र जित्न सकेको छ भने ७ खेलमा पराजय भोगेको छ । एक खेल वर्षाका कारण रद्द भएको छ । यस विश्वकपमा नेपालको यो लगातार तेस्रो हार हो । सन् २०२४ को विश्वकपमा पनि नेपालले ४ मध्ये ३ खेल हारेको थियो । पहिलो दुई जित नेपालले १२ वर्षअघिको विश्वकपमा पाएको थियो ।

नेपालबाट दीपेन्द्रको ब्याट चम्केको थियो । दीपेन्द्र र सोमपाल कामीको प्रयासमा नेपालले अन्तिम १० ओभरमा ९१ रन जोडेर केही प्रतिस्पर्धा दिन सक्यो, जसको कारण टस हारेपछि ब्याटिङ निम्तो पाएको नेपालले निर्धारित २० ओभरमा ८ विकेट गुमाई १ सय ३३ रन बनायो । दीपेन्द्रले ५८ रन बनाए । नेपाली खेलाडीको ट्वान्टी–२० विश्वकपमा यो दोस्रो अर्धशतक हो र उच्च स्कोर पनि ।

सुवास खकुरेलले सन् २०१४ मा अफगानिस्तानविरुद्ध ५६ रन बनाउनु नै ठूलो स्कोर थियो । नेपालले पहिलो ओभरमै विकेट गुमाएको थियो । वेस्ट इन्डिजका अकेल हुसैनले कुशल भुर्तेललाई पाँचौं बलमा १ रनमै बोल्ड गरे । कप्तान रोहित पौडेल ७ बलमा ५ रनमात्र बनाई म्याथ्यु फोर्डको बलमा एलबीडब्लू आउट भए ।

त्यसपछि जेसन होल्डरले शेख दाजुभाइ आसिफ र आरिफलाई आउट गरे । दुई चौका प्रहार गरी १० बलमा ११ रन बनाएका आसिफले फाइनलेगमा क्याच दिन पुगे । आरिफ पनि २ रनमा मिडविकेटमा क्याचआउट भए । नेपालले पावर प्लेको पहिलो ६ ओभरमा २२ रनमात्र बनाउँदा ३ विकेट गुमाइसकेको थियो । त्यसपछिको ४ ओभरमा नेपालले २० रन जोड्यो । 

लोकेश बमले १३ रन बनाए । १५ बल खेल्दै २ चौका प्रहार गरेका उनी सामर जोसेफको लेग साइडमा पुगेको बलमा विकेटकिपरलाई क्याच दिन पुगे । दीपेन्द्र र  गुलशन झाले छैटौं विकेटमा २६ बल खेल्दै २७ रनको साझेदारी गरे । एक छक्का प्रहार गरेका गुलशनलाई रोस्टन चेजले बोल्ड गरिदिए । 

नेपाली इनिङ्सको सबैभन्दा ठूलो साझेदारी गर्नेक्रममा दीपेन्द्र र सोमपाल अन्तिम ५ ओभर जमे । नेपालले  अन्तिम ५ ओभरमा ६० रन जोडेको थियो । होल्डरले  फालेको १८ औं ओभरमा नेपालले १६ रन बटुल्यो । त्यसमा सोमपालले होल्डरलाई लगातार तीन चौका प्रहार गरे । दीपेन्द्रले २ छक्का प्रहार गरेपछि नेपालले १९ ओभरमा कुल १८ रन जोड्यो । 

दीपेन्द्रले अन्तिम ओभरमा होल्डरको बलमा लङअफमा क्याच दिन पुगे । उनले ४७ बल खेल्दै समान ३ चौका र छक्का प्रहार गरे । करण केसी १ रन बनाई इनिङ्सको अन्तिम बलमा आउट भए । होल्डरले ४ ओभरमा २७ रन खर्चेर ४ विकेट लिए । फोर्डले ४ ओभरमा १ मेडन राख्दै १० रनमात्र खर्चेर १ विकेट लिए । फोर्डसँगै हुसैन, जोसेफ र चेजले १–१ विकेट लिए । 

लगातार तेस्रो खेल जित्दै ‘सुपर एट’ मा प्रवेश गर्न वेस्ट इन्डिजलाई लक्ष्यमा पुग्न खासै गाह्रो भएन । ब्रान्डन किङ २२ रन बनाई आउट भए । नन्दन यादवको बलमा कुशल भुर्तेलले मिडअनमा उनको क्याच लिए । किङ र कप्तान साई होपले ६ ओभरभित्र पहिलो विकेटमा ४३ रनको साझेदारी गरेका थिए । त्यसपछि होप र सिमरन हेटमायरले ४१ बलमा अर्धशतकीय साझेदारी पूरा गरे, जसमा हेटमायरको योगदान ३७ रनको थियो । त्यसपछि भने होप आक्रामक बने । 

यी दुईले दोस्रो विकेटमा कुल ५९ बल खेल्दै ९१ रनको अविजित साझेदारी गरे । होप ६१ र हेटमायर ४६ रन बनाए । होपले ४४ बल खेल्दै ५ चौका र ३ छक्का तथा हेटमायरले ३२ बल खेल्दै ४ चौका र २ छक्का प्रहार गरे । 

नेपालले सेप्टेम्बरमा यूएईको शारजहाँमा वेस्ट इन्डिजसँग तीन खेलको ट्वान्टी–२० अन्तर्राष्ट्रिय शृंखला ऐतिहासिक रूपमा २–१ ले जितेको थियो । त्यो टोलीका केवल दुई खेलाडी हुसैन र होल्डरमात्र अहिले वेस्ट इन्डिजको टोलीमा छन् । वेस्ट इन्डिजले धेरै नयाँ खेलाडीलाई मौका दिँदा हुसैनले शारजहाँमा क्यारेबियन टोलीको नेतृत्व गरेका थिए ।