काठमाडौँ — लुम्बिनी लायन्सले नेपाल प्रिमियर लिग (एनपीएल) क्रिकेटको मंगलबारको खेलमा पहिला फिल्डिङ गर्ने भएको छ । लुम्बिनीका कप्तान रोहित पौडेलले त्रिवि क्रिकेट अन्तर्राष्ट्रिय रंगशाला कीर्तिपुरमा टस जितेर काठमान्डु गोर्खाजलाई ब्याटिङका लागि बोलाएका हुन् ।

रोहित पौडेलको नेतृत्वमा रहेको लुम्बिनीले दुई खेलमध्ये एकमा जित निकाल्दै दुई अंकसहित चौथो स्थानमा छ । लुम्बिनीले आफ्नो पहिलो खेलमा चितवन राइनोजलाई ६ विकेटले पराजित गरेको थियो । दोस्रो खेलमा लुम्बिनीलाई कर्णाली याक्सले ९ विकेटले हराएको थियो ।

यस्तै  करण केसीको कप्तानीमा रहेको काठमान्डुले यो सिजनमा अहिलेसम्म खेलेका तीन खेलमध्ये दुईमा हार व्यहोरेको छ भने एकमा जित निकालेको छ । काठमाण्डु दुई अंकसहित तेस्रो स्थानमा छ ।

काठमान्डुले पहिलो खेलमा डिफेन्डिङ च्याम्पियन जनकपुर बोल्टसलाई ५ विकेटले पराजित गरेको थियो भने दोस्रो खेलमा सुदूरपश्चिम रोयल्ससँग २९ रनले पराजित भएको थियो । तेस्रो खेलमा विराटनगर किंग्सले ५ विकेटको पराजित गरेको थियो ।

एनपीएलमा काठमाडौंले लुम्बिनीलाई १८ रनले हराएको थियो । दुवै टोलीलाई प्लेअफ पुग्ने सम्भावना जीवित राख्न आजको खेल महत्त्वपूर्ण मानिएको छ । दुवै टोलीलाई जित निकाल्न पर्ने दबाब छ ।