काठमाडौँ — सुदूरपश्चिम रोयल्सले नेपाल प्रिमियर लिग (एनपीएल) क्रिकेटको आइतबारको दोस्रो खेलमा पोखरा एभेन्जर्सलाई १ सय ५४ रनको लक्ष्य दिएको छ । पोखराका कप्तान कुशल भुर्तेलले टस जितेपछि ब्याटिङको निम्तो पाएको सुदूरपश्चिमले निर्धारित २० ओभरमा ७ विकेट गुमाई १ सय ५३ रन बनायो ।

प्रतियोगितामा ब्याटिङबाट पूर्ण रूपमा असफल रहेका आरिफ शेखले अविजित ४२ रन बनाएपछि सुदूरपश्चिमले पोखरालाई चुनौतीपूर्ण स्कोर दिन सफल भएको हो । प्रतियोगिताको यसअघिका ५ खेलमा २२ रनमात्र बनाउन सकेका आरिफले ३८ बल खेलि २ चौका र १ छक्का प्रहार गरे ।

सैफ जैब ९, विनोद भण्डारी १४, ब्रान्डन म्याकमुलेन १६ बलमा १ चौका र २ छक्कासहित २३, हरमित सिंह १३, कप्तान दीपेन्द्रसिंह ऐरी १६ बलमा १ छक्कासहित २० रन बनाई आउट भए । इशान पाण्डे ११ बलमा १० रन बनाई रिटायर्ड आउट भए । उनको स्थानमा आएका स्कट कुग्लेनले ३ बलमा २ रनमात्र बनाउन सके । नरेश बुढाएर ३ बल खेली ६ रनमा अविजित रहे ।