गाउसको शतकसँगै पोखराको कीर्तिमानी जित

आन्द्रिज गाउसले शतक बनाउदै दिनेश खरेलसँग कीर्तिमानी साझेदारी गरेपछि पोखरा एभेन्जर्सले नेपाल प्रिमियर लिग (एनपीएल) क्रिकेटमा पहिलो विजय हात पारेको छ । गाउस र दिनेशले पहिलो विकेटमा १ सय ७६ रनको साझेदारीपछि पोखराले शुक्रबारको दोस्रो खेलमा लुम्बिनी लायन्सलाई १० विकेटले पराजित गर्यो ।गाउसले १ सय ४ रन बनाएपछि पोखराले १ सय ७१ रनको लक्ष्य १६.५ ओभरमा १ सय ७६ रन बनाउँदै पूरा गर्यो। उनी एनपीएलमा शतक बनाउने पहिलो खेलाडी बनेका छन्। एनपीएलमा यो सबैभन्दा ठूलो साझेदारी पनि हो।गाउसले ५५ बल खेली १२ चौका र ५ छक्का प्रहार गरे। उनले त्रिवि क्रिकेट मैदान कीर्तिपुरमा २० बलमा अर्धशतक र ५४ बलमा आफ्नो शतक पूरा गरेका थिए। दिनेशले ४६ बलमा अविजित ६१ रन बनाए। उनले स्कोर बराबरी भएको समयमा सूर्य तामाङको बलमा छक्का प्रहार गरेका थिए। दिनेशले समान ४ चौका र छक्का प्रहार गरे।तस्बिरहरू : हेमन्त श्रेष्ठ/कान्तिपुरपहिलो दुई खेल हारेको पोखराले तेस्रो खेलमा आएर पहिलो विजय निकालेको हो। लुम्बिनी लगातार दोस्रो खेलमा पराजित भएको हो। यस प्रतियोगितामा एउटै खेल नजित्ने टोली लुम्बिनी मात्रै हो। यसअघि टस जितेर ब्याटिङ रोजेको लुम्बिनीले निर्धारित २० ओभरमा ५ विकेट गुमाई १ सय ७० रन बनाएको थियो। कप्तान रोहित पौडेलले ५९ बलमा ९५ रन बनाए। इनिङ्सको अन्तिम बलमा विवेक यादवले २ रन पूरा गरिसकेपछि तेस्रो रन लिन दौडिँदा रोहित रन आउट भए।नेपाली राष्ट्रिय टोलीको पनि कप्तान रहेका रोहितले १० चौका र ४ छक्का प्रहार गरे। रोहित र टर्म मुर्सले ७७ बलमा १ सय १० रनको साझेदारी गरे। १९औं ओभरको अन्तिम बलमा रनआउट भएका मुर्सले ३८ बल खेली समान २ चौका र छक्का प्रहार गरे।लुम्बिनीका ओपनिङ जोडि आशुतोष घिरोहिया र उनमुक्त चन्द दुवै शून्यमा आउट भए। दुवैलाई विपिन खत्रीलाई आउट गरे। सन्दीप जोराले १५ बलमा १८ रन बनाए। नयाँ बल लिएर आएका विपिनले ३ ओभरमा १८ रन खर्चेर २ विकेट लिए। अर्को विकेट म्याट क्रिच्लेले लिए।