कोलकाता — साहिन अफ्रिदीको तीन विकेट तथा फाखर जमान र अब्दुल्लाह सफिकको अर्धशतक मदतमा पाकिस्तानले विश्वकप २०२३ मा मंगलबार बंगलादेशलाई ७ विकेटले पराजित गरेको छ । लगातार खराब प्रदर्शनपछि यो जितले पाकिस्तान टोलीमा उत्साह थप्नेछ । जितपछि पाकिस्तानको ६ अंक भएको छ । टोली अफगानिस्तानलाई उछिनेर पाँचौं स्थानमा उक्लेको छ ।

लगातार चार हारपछि यो जित निस्केको हो । यसले टोलीको सेमिफाइनल सम्भावना जीवन्त बनाएको छ । पाकिस्तानले अन्तिम चारको सम्भावनाका लागि आफ्नो अन्तिम दुई खेलमा निश्चित जित निकाल्नुपर्नेछ । अब पाकिस्तानले बेंग्लुरुमा न्युजिल्यान्डको सामना गर्नेछ भने कोलकातामा हुने अर्को खेलमा इंग्ल्यान्डविरुद्ध भिड्ने छ । त्यसबाहेक पाकिस्तानका लागि अन्य खेलका नतिजा पनि आफूअनुकूल हुन आवश्यक पर्नेछ ।

बंगलादेश भने २ अंकमै सीमित रहँदै नवौं स्थानमा छ । हारले बंगलादेश प्रतियोगिताबाट बाहिरिएको छ र यो दुर्भाग्य बेहोर्ने प्रतियोगिताकै पहिलो टिम बनेको छ । जितका लागि २ सय ५ रन पछ्याएको पाकिस्तानले ३२.३ ओभरमा ३ विकेट गुमाएर विजयी रन बनायो । त्यसमा सफिकले ६८ र जमानले ८१ रन बनाए । उनीहरूले पहिलो विकेटमा १ सय २८ रन बनाए ।