काठमाडौँ — पाकिस्तान क्रिकेट टिमका प्रमुख छनोटकर्ता(चिफ सेलेक्टर)  इन्जमाम-उल-हकले राजीनामा दिएका छन् । विश्वकप क्रिकेट चलिरहेका बेला सोमबार प्रमुख छनोटकर्ता इन्जमामले राजीनामा दिएको जी न्युज उर्दुले जनाएको छ ।

उनीमाथि खेलाडीहरूको व्यवस्थापनसँग सम्बन्धित कम्पनीमा साझेदार रहेको आरोप लागेको थियो । केही कम्पनीमा कप्तान बाबर आजम र मोहम्मद रिजवान पनि जोडिएको समाचारहरू प्रकाशित भएको थियो । तर यो समाचारको स्वतन्त्र रूपमा भने पुष्टि हुन सकेको छैन ।

पाकिस्तानी टेलिभिजन समा टीभीको 'जोर का जोर' कार्यक्रममा अन्तर्वार्ता दिने क्रममा इन्जमामले आरोपपछि आफू पाकिस्तान क्रिकेट बोर्डमा गएको र आरोपमाथि छानबिन गर्न आग्रह गरेको बताएका छन् ।

पाकिस्तान क्रिकेट बोर्ड उक्त आरोपको छानबिनका लागि ५ सदस्यीय टोलीको समिति गठन गरेको जनाएको छ । पाकिस्तानी क्रिकेट टिमका पूर्वकप्तानसमेत रहेका इन्जमामले छानबिनका लागि बोर्डलाई पूर्ण रूपमा सघाउने प्रतिबद्धता जनाएका छन् । 'हामी क्रिकेटर हौँ र हामी जुनबेला पनि देशको सेवाका लागि तयार छौँ । मविरुद्ध जाँच हुने मैले राजीनामा दिनु स्वाभाविक हो,' उनले भनेका छन् ।