रौतहट — राजनीतिमा धैर्य र निरन्तरताको प्रतिफलको उदाहरण रौतहटकी ४० वर्षीया डा. शाहजान खातुनले प्रस्तुत गरेकी छन् । २०७९ को स्थानीय तह निर्वाचनमा झिनो मतान्तरले गौर नगरपालिकाको उपप्रमुख पदमा पराजित भएकी खातुन अहिले नेपाली कांग्रेसको तर्फबाट समानुपातिकतर्फबाट प्रतिनिधिसभा सदस्य बनेकी छन् । 

पेशाले चिकित्सक खातुन गौर नगरपालिका–१ की बासिन्दा हुन् । स्थानीय स्तरमा बौद्धिक र सेवामूखी छविका कारण उनी छोटो समयमै राजनीतिमा स्थापित हुन सफल भएकी हुन् । २०७९ वैसाखमा सम्पन्न स्थानीय तह निर्वाचनमा उनी गौर नगरपालिकाको उपप्रमुख पदका लागि चुनावी मैदानमा उत्रिएकी थिइन् ।

अत्यन्तै प्रतिस्पर्धात्मक रहेको उक्त निर्वाचनमा तत्कालीन एकीकृत समाजवादीका शैलकुमार साहसित १ हजार १२४ मतले पराजित हुन पुगिन् । साहले ४ हजार ८०९ र खातुनले ३ हजार ६८५ मत प्राप्त गरिन् । त्यतिबेला चुनावी नतिजा आफ्नो पक्षमा नआए पनि उनले मतदातासँगको सामीप्य र पार्टीभिक्रको सत्रियतालाई कायमै राखिन् । 

कांग्रेसले डा. खातुनको राजनीतिक सक्रियता, पेशागत दक्षता र महिला तथा मुस्लिम समुदायको प्रतिनिधित्वलाई कदर गर्दै समानुपातिक सूचीमा समावेश गरेको थियो । एक चिकित्सकको रुपमा समाज बुझेको र प्रतिनिधिसभामा पुगेपछि मधेश प्रदेशको स्वास्थ्य अवस्था, महिला सशक्तीकरण र शिक्षालाई मुख्य एजेन्डा बनाउने उनले बताइन् । ‘हिजो निर्वाचनमा पराजित भए पनि जनताको सेवा गर्ने अठोट कायमै थियो । आज पार्टीले दिएको यो जिम्मेवारीलाई म मधेशको विकास र खासगरी स्वास्थ्य क्षेत्रको सुधारमा केन्द्रित गर्नेछु,’ उनले भनिन्, ‘समाजको घाउ निको पार्न एउटा चिकित्सकले औषधि मात्र दिएर पुग्दैन, राज्यको नीति नै जनमैत्री हुनुपर्छ । आगामी दिनमा स्वास्थ्य क्षेत्रको सुधार र मधेशको समृद्धिका लागि आफ्नो राजनीतिक यात्रालाई थप सशक्त बनाउने अभियानमा छु ।’ 

बंगलादेशबाट एमबीबीएस गरेकी खातुनको सदरमुकाम गौरमा तैयब हेल्थ केयर अस्पताल संचालनमा छ । उनका श्रीमान् पनि चिकित्सक हुन् । श्रीमान् डा. सरफराज तैयबले अस्पताल सम्हालेका छन् । राजनीतिमा शिक्षित र दक्ष व्यक्तिको प्रवेशले नीति निर्माण तहमा सकारात्मक प्रभाव पार्ने स्थानीयको विश्वास छ । 

मधेश प्रदेशको राजनीति र स्वास्थ्य क्षेत्रमा पछिल्लो समय खातुनको नाम निकै चर्चामा छ । पेशाले चिकित्सक भए पनि हाल उनी सामाजिक रुपान्तरण र राजनीतिको मैदानमा सक्रिय छिन् । डा. खातुनले आफ्नो चिकित्सा यात्रा सेवामुखी भावबाट सुरु गरेकी थिइन् । विशेषगरी रौतहट जस्तो जिल्लामा महिला स्वास्थ्य र प्रजनन् स्वास्थ्यका क्षेत्रमा उनले पुर्‍याएको योगदानलाई स्थानीय तहमा निकै प्रशंसा गरिने गौरका समाजसेवी मोहन यादवले सुनाए । 

२०७८ सालमा कांग्रेसको सदस्यता लिएर उनी सक्रिय राजनीतिमा होमिएकी हुन् । उनका बुवा शेख नसिम अख्तर पनि वीरगन्जमा कांग्रेसका पुराना नेता हुन् । बुवाकै प्रेरणाले आफू राजनीतिमा आएको उनले बताइन् । वीरगन्जमा जन्मिएकी उनले वीरगन्जकै मिनिल्याण्ड स्कुलबाट एसएलसी, हरिखेतान कलेजबाट आईएस्सी र बंगलादेशबाट एमबीबीएस गरेकी थिइन् । २०६५ सालमा गौरका चिकित्सक सरफराज एकवालसित उनको विवाह भएको थियो ।