गुल्मी — गुल्मीका दुवै निर्वाचन क्षेत्रमा मतगणना सुरू भएको छ । क्षेत्र नम्बर १ को जिल्ला समन्वय समितिको हल र क्षेत्र नम्बर २ को रेसुंगा बहुमुखी क्याम्पस हलमा मतगणना सुरू भएको हो ।

बिहान ८ बजे जिल्ला प्रशासन कार्यालयमा बसेको सर्वदलीय  बैठकले बिहान १० बजेदेखि मतगणना गर्ने निर्णय भए पनि केही ढिला ११:१५ बजेदेखि मतगणना सुरु भएको जिल्ला निर्वाचन अधिकारी ऋषिराम घिमिरेले बताए ।

क्षेत्र नम्बर १ मा जम्मा ६४ हजार ७८७ मत खसेको छ । प्रतिनिधिसभा सदस्यका लागि प्रत्यक्षतर्फ उक्त मत खसेको हो ।  प्रमुख जिल्ला अधिकारी बद्रीनाथ गैह्रेले यस क्षेत्रमा जम्मा ५३.०२३ प्रतिशत मत खसेको जानकारी दिए । जसमा मत खसालेका महिला मतदाता ३६ हजार २८ जना र पुरुष मतदाता २८ हजार ७ सय ५९ जना रहेका छन् । यस क्षेत्रमा कुल मतदाता १ लाख २२ हजार १८६ जना रहेका थिए । जसमध्ये महिला मतदाता ६२ हजार २ सय ७२ जना र पुरुष मतदाता ५९ हजार ९ सय १४ जना रहेका थिए ।