काठमाडौं — कांग्रेसका उपसभापति विश्वप्रकाश शर्माले कुनै एक व्यक्ति हिरो भएर देश नबन्ने दाबी गरेका छन् । शर्माले रास्वपाका बालेन शाह र रवि लामिछानेतिर संकेत गर्दै रोडमा हात हल्लाएर एक्लै हिँडेर देश नबन्ने र यसका लागि टिम र टिमवर्क चाहिने बताए । यस्ताे टिम र टिमबर्क कांग्रेसमा मात्रै भएकाे उनकाे भनाइ छ ।

आज पोखरामा आयोजित चुनावी सभालाई सम्बोधन गर्दै उनले यसका लागि गगनकुमार थापा नेतृत्वको कांग्रेसमात्र विकल्प भएको दाबी गरे । उनले सय दिनमा विदेश जाने नेपालीलाई स्वदेश फर्काउने भनेकै भरमा नहुने र यसका लागि देशमा बस्न सक्ने वातावरण बनाउनुपर्ने तर्क गरे । 

उनले एयरपोर्ट गएर बुद्धको देश भन्दैमा विदेश जान युवा नरोकिने भन्दै शर्माले त्यसका लागि यहाँ रोजगारी र बस्न लायक वातावरण बनाउनुपर्ने बताए । धमाधम विदेश गइरहेका युवाहरूलाई रोक्न सारा नेपालीमा आसा र विश्वास जगाउन सक्ने काम गर्नुपर्ने उनले बताए । उनले कांग्रेसले घोषणापत्रमा ती सबै कुरा उल्लेख गरेको दावी पनि गरे ।