काठमाडौँ — कांग्रेसका महामन्त्री विश्वप्रकाश शर्माले पार्टीको दोस्रो विशेष महाधिवेशनमा पेस गरेको प्रतिवेदनले कांग्रेसको वर्तमान अवस्था, जनआक्रोशको कारण र भावी राजनीतिक यात्राका लागि आवश्यक दिशानिर्देश अघि सारेको छ ।

प्रतिवेदनमा युवा–केन्द्रित असन्तोष र जेनजी आन्दोलनलाई गम्भीरतापूर्वक समीक्षा गरिएको छ । जनआक्रोश बाहिरी शक्ति वा अचानक उत्पन्न घटना नभई राजनीतिक, आर्थिक, सामाजिक र शासकीय कमजोरीको उपज भएको निष्कर्ष निकालिएको छ । कांग्रेसले नागरिकको असन्तुष्टि समयमै चिन्न र सम्बोधन गर्न नसकेको स्वीकार गर्दै त्यसबाट पाठ सिक्नुपर्ने उल्लेख छ ।

महामन्त्री शर्माले कांग्रेसलाई पुनर्निर्माण  र पुनःपरिचय  गर्नुपर्ने आवश्यकता औँल्याएका छन् । पुरानै नाम, झण्डा र चिह्न कायम राख्दै सोच, कार्यशैली र राजनीतिक संस्कारमा नवीनता ल्याउनुपर्ने उनको जोड छ । ‘पुराना बानीले नयाँ भविष्य बनाउन सकिँदैन’ भन्ने सन्देशमार्फत आत्मपरिवर्तन अपरिहार्य भएको प्रतिवेदनले औँल्याएको छ ।

प्रतिवेदनमा पछिल्ला वर्षहरूमा सरकार परिवर्तनको निरन्तरता, नीतिगत अस्थिरता, भ्रष्टाचार, प्रशासनिक झन्झट र आर्थिक सुस्तताले जनविश्वास कमजोर बनाएको उल्लेख छ । शिक्षा, स्वास्थ्य, रोजगारी, कृषि र संघीयताको कार्यान्वयनमा देखिएका कमजोरीलाई स्पष्ट रूपमा सूचीबद्ध गर्दै सुशासनबिना समुन्नति सम्भव छैन भन्ने निष्कर्ष निकालिएको छ ।