विशेष महाधिवेशनका सन्दर्भमा आयोजित बैठकपछि जारी गरिएको विज्ञप्तिमा उक्त समूहले घटनालाई महाधिवेशन बदनाम गर्ने उद्देश्यले अतिरञ्जित रूपमा प्रस्तुत गरिएको हुन सक्ने आशंका व्यक्त गरेको छ ।
What you should know
काठमाडौँ — यही पुस २७ र २८ गते विशेष महाधिवेशन आयोजना गर्ने पक्षधर समूहले पार्टी कार्यालयमा भएको घटनासँग आफ्नो कुनै पनि प्रकारको संलग्नता नरहेको स्पष्ट गरेको छ ।
विशेष महाधिवेशनका सन्दर्भमा आयोजित बैठकपछि जारी गरिएको विज्ञप्तिमा उक्त समूहले घटनालाई महाधिवेशन बदनाम गर्ने उद्देश्यले अतिरञ्जित रूपमा प्रस्तुत गरिएको हुन सक्ने आशंका व्यक्त गरेको छ ।
‘पार्टी कार्यालयमा भएको प्रदर्शनमा हाम्रो कुनै पनि किसिमको संलग्नता छैन, घटनाको वास्तविकता सार्वजनिक गर्न निष्पक्ष र विश्वसनीय छानबिन गरिनुपपर्छ,’ विज्ञप्तिमा भनिएको छ ।
केन्द्रीय कार्यसम्पादन समितिको बैठकमा सहभागी हुन जाँदै गरेका पूर्वउपसभापति विमलेन्द्र निधिलाई गेटबाहिर विशेष महाधिवेशनको पक्षमा रहेका एक हुल कार्यकर्ताले घेरेर नाराबाजी गरेका थिए । केही छिन निधि र कार्यकर्ताका बीचमा चर्काचर्की समेत परेको थियो ।
विशेष महाधिवेशन पक्षधरहरूले कार्यसम्पादन समितिको बैठकले गरेको निर्णय स्वीकार्य नभएको बताएका छन् । विधानले विशेष महाधिवेशन बोलाउन बाध्यकारी व्यवस्था गरे पनि केन्द्रीय कार्यसम्पादन समितिको गत शुक्रबारको बैठकले यसको औचित्य नभएको भनेर निर्णय लिएको थियो । साथै, विशेष महाधिवेशन आह्वानका लागि यसअघि पार्टी नेतृत्वसमक्ष बुझाइएका विभिन्न पत्र तथा स्मरणपत्रहरूलाई उनीहरुले पुनः पार्टी नेतृत्वको ध्यानाकर्षण गराएका छन् ।
त्यसैगरी, विशेष महाधिवेशनका सन्दर्भमा जिम्मेवार पदमा रहेका केही नेताहरूबाट आएका अतिरञ्जित र गैरजिम्मेवार अभिव्यक्तिप्रति गम्भीर खेद प्रकट गरिएको छ । यस्ता अभिव्यक्तिले पार्टीको आन्तरिक लोकतन्त्र र मर्यादामाथि नकारात्मक प्रभाव पार्ने चेतावनी दिइएको छ ।
वक्तव्यमा भनिएको छ, ‘वैधानिक सर्वोच्चता कमजोर पार्ने, महाधिवेशन प्रतिनिधिहरूको मानमर्दन गर्ने तथा उनीहरूलाई अपमानित गर्ने कुनै पनि कार्य स्वीकार्य हुन सक्दैन, विशेष महाधिवेशन प्रतिनिधिहरूको गरिमा र अधिकारमाथि हस्तक्षेप गर्ने प्रयासको कडा विरोध गर्दछौं ।’
