काठमाडौँ — महाधिवेशनमा हलमा पार्टीको नेतृत्वप्रति प्रश्न उठाउने नेता तथा कार्यकर्तामाथि निगरानी भए पनि नेताहरूले पार्टीमा आन्तरिक लोकतन्त्र कमजोर भएको बताएका छन् । उनीहरूले विधान नेतामुखी भएको भन्दै कार्यकर्तामुखी बनाउनु पर्ने सुझाव दिएका छन् ।

महाधिवेशनले तयार गरेको विधानलाई नेतृत्व चयन गर्ने महाधिवेशनले परिवर्तन गर्न नहुने सुझाव पनि नेताहरूले दिएका छन् । राजनीतिक कार्यदिशाले बहुदलीय जनवादको मर्म समातेर सरकारमा हुँदा जनताको पक्षमा काम गर्नुपर्ने उनीहरूको भनाइ थियो ।

पार्टी सरकारमा भए पनि सत्ता जोगाउन केन्द्रित भएकाले जनताका काम गर्न चुकेको विषय पनि समूहमा उठेको छ । पार्टी नेताको जिम्मेवारी, नियुक्तिमा सीमितले लाभ लिइरहेको भन्दै प्रतिनिधिहरूले विधानमै व्यवस्था गर्नुपर्ने माग गरेका छन् ।

पूर्व राष्ट्रपति विद्या भण्डारी सक्रिय राजनीतिमा आउने/नआउने नैतिक प्रश्न भए पनि उनलाई रोक्ने नाममा विधानको गलत व्याख्या गर्न नहुने प्रतिनिधिहरूको सुझाव छ ।

पार्टी नेतृत्व हस्तान्तरणका लागि उमेर हद र एउटै व्यक्ति दुई कार्यकाल हुन नुहुने प्रावधान हटाएर नेतृत्व हस्तान्तरण र क्षमता अनुसार जिम्मेवारी पाउने सम्भावना सकिएको प्रतिनिधिहरूको भनाइ छ ।

प्रतिवेदनमाथि समूहहरुमा आफ्ना धारणा खुलेर राख्ने वातावरण भएको केन्द्री सदस्य निरज आचार्यले बताए । ‘सबै समूहका प्रतिनिधिहरूले प्रतिवेदन, विधानमाथि खुलेर धारणा राखेको देखिएको छ,’ उनले भने, ‘प्रतिवेदनमाथि सुझाव धेरै छन् ।’