काठमाडौँ — २३ भदौको जेन-जी आन्दोलनका क्रममा मृत्यु भएका ३४ वर्षीय विनोद महर्जनमाथि सुरक्षा निकायले बिना चेतावनी टाउकोमा गोली प्रहार गरेको परिवारले आरोप लगाएका छन् । दाइ रत्न महर्जनले जाँचबुझका क्रममा दिएको बयानमा विनोदको मृत्यु अस्पताल पुग्नुअघि नै घटनास्थलमै भएको दाबी गरेका छन् ।

चित्रकला र हस्तकलामा संलग्न विनोद आन्दोलनमा साथीहरुसँग स्वतःस्फूर्त रूपमा सहभागी भएका थिए । घटनाको दिन उनी कहाँ थिए भन्ने स्पष्ट नभए पनि अन्तिमपटक उनलाई शंखमूल क्षेत्रमा दिउँसो करिब १२ बजे छिमेकीले पानी वितरण गरिरहेको अवस्थामा देखिएको परिवारको भनाइ छ ।

भदौ २३ गते प्रदर्शनका क्रममा गोली लागेपछि प्रदर्शनकारीहरूले नै उनलाई अस्पताल पुर्‍याएका थिए । अस्पतालको अभिलेख अनुसार दिउँसो १ बजेर ५८ मिनेट जाँदा उनको मृत्यु भएको उल्लेख छ । तर, सामाजिक सञ्जालमा सार्वजनिक भिडियोले उनको मृत्यु घटनास्थलमै भएको संकेत गरेको परिवारको दाबी छ ।