काठमाडौँ — पूर्वप्रधानमन्त्रीद्वय शेरबहादुर देउवा र पुष्पकमल दाहाल तथा पूर्वमन्त्री दीपक खड्काको घरमा भदौ २४ गते प्रदर्शनकारीले आगजनी गरे। देउवा, दाहाल र खड्काको घरमा आगजनी हुँदा पैसा जलेको विषयमा सामाजिक सञ्जालमा तत्कालै छ्यापछ्याप्ती भएको थियो। त्यसक्रममा प्रदर्शनकारीले घरभित्र गएर पैसा निकालेको र पछि नोट जलेको भिडियो र तस्बिर सामाजिक सञ्जालमा राखेका थिए ।

भोलि–पर्सिपल्टसमेत मानिसले भग्नावशेषमा केही खोजिरहेको भिडियो पनि सार्वजनिक भएका थिए । सरकारले आगजनीको पर्सिपल्ट मात्र नेताहरूका जलेका घरबाहिर प्रहरी सुरक्षा दिएर प्रवेशमा रोक लगाएको थियो ।

२५ भदौको दिउँसो २ बजेर ४४ मिनेटमा ‘सिभान्डी ३’ नामक टिकटक प्रयोगकर्ताबाट एउटा भिडियो पोस्ट भएको छ, जसमा बूढानीलकण्ठस्थित देउवा निवासमा जलेका नोटहरू देखाइएको छ । भिडियोमा लेखिएको छ, ‘शेरबहादुर भ्रष्टको घरमा पैसाको सत्यानाश हेर्नॅस् । यो गरिब जनताले पाएको भए देशको हालत हुन्थ्यो ।’ भिडियोमा ती व्यक्तिले आधाआधी डढेका हजार र पाँच सयका नोट देखाएका छन् । 

११ सेप्टेम्बर अर्थात् २५ भदौको साँझ ८ बजेर ३७ मिनेटमा ‘नेपाली डट फायरफाइल्स’ नामक टिकटक प्रयोगकर्ताले ‘देउवा निवासमा भेटेको पैसा’ लेखेर भिडियो पोस्ट गरेका छन् । त्यसको भोलिपल्ट अपराह्न ४ बजेर ४५ मिनेटमा ‘भाइरलभिडियोहब ५’ नामक टिकटक प्रयोगकर्ताले पनि त्यो भिडियो पोस्ट गरेका छन् । भिडियोमा आधाआधी जलेका हजार र पाँच सयका नोट देखिन्छ । भिडियोको भ्वाइसओभरमा सुनिन्छ, ‘हैन हो दाइ, यसो हेर्नलाई मात्रै आ... पैसा, डलर । सब पैसा यो जलेको ।’ यी भिडियो एआईको प्रयोग गरी बनाइएका भने होइनन् । विभिन्न तथ्य जाँचकीले यी भिडियो सत्य रहेको देखाएका छन् ।

आकाशमा पैसा उडिरहेको भिडियो पनि सामाजिक सञ्जालमा फैलिएको छ । दनदनी जलिरहेको घरबाट पैसाका नोटहरू आकाशमा उडेको भिडियो २४ भदौमै सामाजिक सञ्जालमा फैलिएको हो । यो भिडियो ‘रजन बुढाथोकी’ नामक फेसबुक प्रयोगकर्ताले अपलोड गरेका थिए । ती प्रयोगकर्ताले यो भिडियो २४ भदौको दिउँसो १२ बजेर ३९ मिनेटमा फेसबुकमा अपलोड गरेका थिए । अरू प्रयोगकर्ताले यस्तै खालका भिडियो पोस्ट गरेका थिए । ती भिडियोमा दुई विषय समान छन्– जलिरहेको घर र उडिरहेको पैसा । भिडियोमा देखिएको घर पूर्वऊर्जामन्त्री तथा कांग्रेसका नेता दीपक खड्काको हो । ती सबै भिडियो पनि ‘क्युरेटेड’ होइनन् । 

माओवादी अध्यक्ष दाहालको घरमा पनि पैसा भेटिएको भन्ने भिडियो आएका छन् । ‘राज कँडेल डट ५५’ नामक टिकटक प्रयोगकर्ताले २७ भदौको अपराह्न ४ बजेर ३८ मिनेटमा ‘प्रचण्डको घरमा पैसा’ भन्दै भिडियो पोस्ट गरेका छन् । ३ मिनेट १७ सेकेन्ड लामो भिडियोमा पैसाको बिटा जलाइएको भन्दै देखाइएको छ ।

भिडियोमा बोल्ने एक व्यक्तिले भनेका छन्, ‘जनता यहाँ भाडा दिन नसकेर, खान नसकेर भोकभोकै बसिरहेका छौं । एक हजारको नोट प्रचण्डको घरमा ओ माई गड । गरिबलाई नांगेझार गरेर यस्तो गर्न हुन्छ ।’ भिडियोमा देखिएका एक व्यक्तिले पैसाको बिटा जस्तो देखिने वस्तु फुकाल्न खोजेको पनि देखिन्छ । तर देउवा र खड्काको घरमा जस्तै जल्दै गरेका नोट भने भिडियोमा देखिएको छैन ।

नेताका घरमा पैसा देखाइएका सबै भिडियो भने सत्य होइनन् । सामाजिक सञ्जालमा कतिपय भ्रामक भिडियो पनि फैलिएका छन् । ‘ज्ञानप्रकाशकार्की’ नामका टिकटक प्रयोगकर्ताले २८ भदौको ३ बजेर ११ मिनेटमा भिडियो पोस्ट गरेका छन्, जसमा ‘शेरबहादुर देउवा हाउस यूएस डलर’ भन्दै लेखिएको छ । माटोमा लतपतिएर भिजेका नोट त्यस भिडियोमा देखिन्छ । तर त्यो भिडियो गत १४ साउनदेखि नै भाइरल भएको पाइयो । भिडियो कहाँको हो भन्ने यकिन छैन ।

देउवाको घरमा बंकर बनाएर पैसा लुकाइएको भनिएका भिडियो पनि सामाजिक सञ्जालमा भाइरल छन् । एउटा भिडियोमा देउवाको घरमा ट्यांकजस्तो देखिने खाडलभित्र पैसा भएको दाबी गरिएको छ । तर त्यसलाई पुष्टि गर्ने आधार देखिँदैन ।

सम्बन्धित समाचार :

जलेको पैसामाथि अनुसन्धान गर्न सम्पत्ति शुद्धीकरणको ढिलासुस्ती