काठमाडौं — बारबरा फाउन्डेसनले हामी नेपाल संस्थासँग जोडेर भ्रामक प्रचार गरिएको भन्दै खण्डन गरेको छ । आइतबार संस्थाका अध्यक्ष  वरिष्ठ नेत्ररोग विशेषज्ञ डा. सन्दुक रुइतले हामी नेपाल संस्थासँग आर्थिक सम्बन्ध नभएको र कोरोना महामारीका बेलामा सहकार्य गरेको प्रस्ट पारेका हुन् । आइतबारको पत्रकार सम्मेलनमा अध्यक्ष रुइतसहित, महासचिव मोहना अन्सारी, कोषाध्यक्ष सुदर्शनराज पाण्डेयलगायतका पदाधिकारी उपस्थित थिए । 

‘देशको पछिल्लो संवदेनशील र तरल अवस्थाको फाइदा उठाउँदै भ्रामक समाचार बनाई हाम्रो नामसमेत जोडी गरिएको अनर्गल प्रचारप्रति गम्भीर ध्यानाकर्षण भएको छ,’ फाउन्डेसनले भनेको छ, ‘यस संस्था र यसका पदाधिकारीहरूको नाम जोडी हामी नेपाल नामक संस्थासँगको सम्बन्धबारे अनर्गल प्रचारसमेत भइरहेको छ । हामी नेपाल नेपालभरि छरिएका युवाहरू संगठन भएकोले कोभिड महामारीका बेलामा सहकार्य गरिएको हो । सो संस्था वा संस्थाका पदाधिकारीसँग हाम्रो कुनै पनि आर्थिक सम्बन्ध छैन ।’

डा. रुइतले मानिसहरूलाई मूल मुद्दाबाट भड्काउने मनशायले गरिएको चरित्रहत्या नगर्न आग्रह गरेका छन् । बारबरा फाउन्डेसन गैरनाफामूलक सामाजिक संस्था बारबरा एडम्सको नामबाट स्थापना भएको उल्लेख गर्दै विज्ञप्तिमा भनिएको छ, ‘उहाँले नेपाललाई आफ्नो कर्मक्षेत्र बनाएर आफ्नो जीवनको ऊर्जावान समय नेपाललाई दिनुभयो र आफूले आर्जेको सम्पूर्ण श्री सम्पत्ति यस संस्थालाई नै दिनुभयो । नेपाली माटोमै सम्पूर्ण जीवन बाँच्नु भएकी बारबराले नेपाली नागरिककै रूपमा यहीँ देहत्याग गर्नु भएको थियो । स्वर्गीय बारबराको व्यक्तिगत सम्पत्तिको स्रोतबाट यो संस्थाको जन्म भएको हो । नेपाली नागरिकको सेवामा समर्पित होस् भन्ने उहाँकै चाहनाअनुरूप यो फाउन्डेसन स्थापित भएको हो ।’