दाहालले उपसभामुख हटाउँदा संसदीय प्रणालीमा असर पर्ने भन्दै यो रोक्नु उचित हुने बताएका थिए ।
काठमाडौँ — सत्ता गठबन्धन कांग्रेस–एमालेले उपसभामुख इन्दिरा रानालाई हटाउन हस्ताक्षर संकलन सुरु गरेपछि माओवादी अध्यक्ष दाहालले कांग्रेस नेता शेखर कोइरालासँग टेलिफोन संवाद गरेका छन् ।
सिंहदबारमा विपक्षी दलको बैठक बस्नुअघि दुई नेताबीच कुराकानी भएको थियो ।
दाहालले उपसभामुख रानालाई हटाउनु गलत हुने भन्दै कोइरालाको भूमिका महत्त्वपूर्ण हुने सुझाव दिएको दाहाल निकट स्रोतले बताएको छ ।
नेता कोइरालाले उपसभामुख हटाउनेबारे दाहालले आफूसँग जिज्ञासा राखेको जानकारी दिए । ‘अहिले आएर उपसभामुख किन हटाउन खोजेको हो ? भनेर प्रचण्डजीले फोन गर्नुभएको थियो,’ उनले भने, ‘यो प्रक्रियामा म सहमत छैन भनेँ ।’
दाहालले उपसभामुख हटाउँदा संसदीय प्रणालीमा असर पर्ने भन्दै यो रोक्नु उचित हुने बताएका थिए । कोइरालाले उपसभामुख हटाउनेबारे आफूलाई जानकारी नभएको भन्दै उनलाई हटाउन नहुनेमा पूर्ववत् अडान कायम रहेको बताएका थिए ।
