काठमाडौँ — चार दिनमा कुवेतमा १६ नेपाली श्रमिकको मृत्यु, न्याय परिषद्‍ले गर्‍यो उच्चका ८८  र जिल्लाका १२२ न्यायाधीशको सरुवा, मनोहराको सुकुमवासी बस्तीमा महानगरले डोजर चलाएपछि झडप, बागमतीका नवनियुक्त ५ मन्त्रीले लिए शपथ, मन्त्रिपरिषद्ले पायो पूर्णतादेखि पश्चिम बंगालमा तीर्थयात्री सवार बस दुर्घटना : १० जनाको मृत्यु, ३५ घाइतेसम्मका खबर चर्चामा रहे । 

0000

पछिल्ला चार दिनमा मात्रै कुवेतमा कार्यरत १६ नेपाली श्रमिकको मृत्यु भएको छ । कुवेतस्थित नेपाली दूतावासका श्रम सहचारी गिरीप्रसाद आचार्यका अनुसार मृत्यु भएकाहरुको पोस्टमार्टम रिपोर्ट नआइसकेकाले मृत्युको यकिन कारण खुल्न सकेको छैन । दूतावासका अनुसार मृत्यु हुने सबैजसो कामदारहरू सुलेमिया क्षेत्रमा रहेको विभिन्न कम्पनीमा कार्यरत थिए । अस्वस्थ भएका १५ नेपाली श्रमिकको भने विभिन्न चार अस्पतालमा उपचार भइरहेको छ ।

0000

न्याय परिषद्‍ले ‍जिल्ला र उच्च अदालतका न्यायाधीशहरुको ठूलो संख्यामा सरुवा गरेको छ । १२२ जिल्ला न्यायाधीश र उच्च अदालतका ८८ न्यायाधीशको सरुवा भएको हो । प्रधानन्यायाधीश प्रकाशमानसिंह राउतको अध्यक्षतामा बसेको परिषद्‌को बैठकले सरुवा गरेको हो । परिषद्‌मा सर्वोच्च अदालतका वरिष्ठतम न्यायाधीश, कानुनमन्त्री, प्रधानमन्त्रीको सिफारिस र नेपाल बारको सिफारिसमा कानुनविद् सदस्य रहन्छन् । आर्थिक वर्ष सुरु भएलगत्तै सरुवा हुनु पर्ने भए पनि करिब एक महिनापछि सरुवा भएको हो ।

0000

मनोहरा खोला किनारका सुकुमवासी र काठमाडौं महानगर प्रहरीबीच झडप भएको छ । काठमाडौं महानगरपालिकाको नगर प्रहरीले बिहानै बस्तीका संरचनामा डोजर चलाउन थालेपछि आक्रोशित स्थानीयले विरोधमा ढुंगामुढा प्रहार गरेका थिए । त्यहीक्रममा सुकुमवासी र नगरप्रहरीबीच झडप भएको हो ।