काठमाडौँ — चिकित्सक धर्नामा बस्दा बिरामी मर्कामा, आन्दोलनरत शिक्षक र प्रहरीबीच झडपदेखि औद्योगिक क्षेत्रमा मागअनुसार बिजुली दिन १५/२० दिन लाग्ने प्राधिकरणको भनाइसम्मका खबर आज चर्चामा रहे ।

000

आवासीय चिकित्सकलाई सरकारी आठौं तह सोसरह मासिक निर्वाह भत्ता उपलब्ध गराउन माग राख्दै आन्दोलरत चिकित्सकले आइतबार माइतीघरमा धर्ना दिएका छन् । काठमाडौं उपत्यकामा वर्षा भए पनि छाता ओढेर र रुझ्दै उनीहरु धर्नामा सहभागी भएको स्वास्थ्यकर्मीहरुका लागि सुरक्षित कार्यस्थल संर्घष समितिका डा. शेषराज घिमिरेले जनाए । नेपाल चिकित्सक संघको आह्वानमा शुक्रबार देशभरका सरकारी अस्पतालमा चिकित्सकले आकस्मिक बाहेकका सेवा बहिष्कार गरेका थिए । 

000

आन्दोलनरत शिक्षकले निषेधित क्षेत्र प्रवेश गर्न प्रहरी ब्यारिकेड तोडेपछि प्रहरीसँग झडप भएको छ । केहीबेरअघि नयाँबानेश्वरमा झडप भएको हो । नयाँ बानेश्वरमा शिक्षकहरूले प्रहरी ब्यारिकेड भत्काएपछि प्रहरीले रोक्न खोज्दा झडप भएको हो । सो क्रममा प्रहरीले पानीको फोहोरा प्रहार गरेको थियो भने भिडबाट ढुंगामुढा प्रहार भएका थिए । नेपाल शिक्षक महासंघका अध्यक्ष लक्ष्मीकिशोर सुवेदीले भने करिब ६० जना शिक्षक घाइते भएको दाबी गरेका छन् ।  

000

काठमाडौंको स्वर्णलक्ष्मी बचत तथा ऋण सहकारीको रकम अपचलनको कसुरमा पक्राउ परेकी कांग्रेसकी सांसद माया राईलाई अदालतबाट तीन दिनको म्याद थप गरेर अनुसन्धान सुरु भएको छ । शनिबार राति आफ्नै निवास बुढानिलकण्ठ नगरपालिका-१० शिव मन्दिर कपनबाट पक्राउ परेकी राईलाई म्याद थपका लागि आइतबार काठमाडौं जिल्ला अदालत उपस्थित गराइएको थियो ।