काठमाडौँ — अमेरिकामा विमान दुर्घटनादेखि त्रिकोणात्मक महिला ट्वान्टी-२० क्रिकेटमा नेपालको हारसम्मका खबर आज कान्तिपुरमा प्रकाशित भएका छन् । बिहीबार भएको विमान दुर्घटना अमेरिकामा सन् २००९ पछिको ठूलो हो । 

अमेरिकाको वासिङटन डिसीमा भएको हवाई दुर्घटनामा ३० जनाको ज्यान गएको पुष्टि भएको छ । वासिङटन डिसीस्थित रोनाल्ड रेगन विमानस्थलमा अवतरण गर्ने तयारीमा रहेको यात्रुवाहक विमान र सेनाको हेलिकप्टरसँग आकाशमै ठोकिएको हो ।

चालकदलका ४ र ६० जना यात्रु बोकेर कान्सस राज्यको विचिटाबाट उडेको विमान धावनमार्ग ३३ मा अवतरणका लागि जाँदै गर्दा ३ सैनिक बोकेको हेलिकप्टरसँग ठोकिएको हो । दुर्घटनामा कुनै पनि यात्रु जीवितै भेटिने सम्भावना नरहेको वासिङटन डिसीका आगलागी तथा आपत्‌कालिन चिकित्सा सेवा प्रमुख जोन ए डोनेली सिनियरलाई उद्धृत गर्दै अमेरिकी सञ्चार माध्यमहरूले जनाएका छन् । 

त्यस्तै आजको राजनीतिक खबरमा शुक्रबारदेखि सुरु हुने संघीय संसद्को अधिवेशनमा विपक्षी दलहरूको तयारीबारे छ ।  संघीय संसद्का विपक्षी राजनीतिक दलहरूले सरकारले हालै ल्याएका अध्यादेशको विरोध गर्ने निर्णय गरेका छन् । प्रमुख प्रतिपक्षी माओवादी केन्द्रको संसदीय दलको कार्यालय सिंहदरबारमा बिहीबार बसेको विपक्षी दलहरूको बैठकले अध्यादेशका विरुद्धमा आवश्यक परेमा सडक प्रदर्शन गर्ने पनि निर्णय गरेको छ । विपक्षी ७ राजनीतिक दलको बैठकले शुक्रबारबाट सुरु हुने संघीय संसद्को हिउँदे अधिवेशनमा कसरी प्रस्तुत हुने भन्ने विषयमा छलफल गरेको थियो । 

त्यस्तै आज देशका विभिन्न ठाउँमा विभिन्न कार्यक्रम गरी सोनाम ल्होसार मनाइएको छ । तामाङ समुदायले प्रत्येक वर्ष माघ शुक्ल प्रतिपदाका दिन मनाउने सोनाम ल्होसार अर्थात् नयाँ वर्ष पर्व आज विविध कार्यक्रम आयोजना गरी मनाइएको हो । काठमाडौंको टुँडिखेलमा पनि विविध कार्यक्रम आयोजना गरी सोनाम ल्होसार मनाइएको छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ ।